Погледнете го новото издание на емисијата „360 степени”, емитувано на 11 март 2024 г. на МРТ 1, во кое гостува Фатмир Битиќи, вицепремиер за економски прашања и потпретседател на СДСМ
Вицепремиерот за економски прашања Фатмир Битиќи, во интервју за „360 степени“ на МРТВ 1, вели дека има политички партии што имаат интерес во предизборниот период одново да се вивнат цените на храната откако Владата не ја продолжи мерката за гарантирани цени, а предлог-законот за забрана за нефер трговски практики се уште не е донесен. Освен за цените на прехранбените производи, со Битиќи разговараме и за предлог-законите за стратешки инвестиции за кои се води дебата во јавноста, при што најголемо влијание привлекува проектот за изградба на когенеративна гасна централа од грчката компанија „Митилинеос“. Зошто министрите на ДУИ отсуствуваа од владината седница на која повторно беа утврдени овие предлог-закони, а пратениците на ДУИ не се појавија на седница на собраниската комисија на која требаше да се расправа за нив – се дел од прашањата до Битиќи. Го прашуваме и дали е можно СДСМ и ВМРО-ДПМНЕ, без ДУИ, да ги изгласаат овие закони или барем дел од нив. Со Битиќи разговараме и за предизборната економска понуда на СДСМ, а го отвораме и случајот со невладината „Неимар-13“ кој го обелоденија колегите од БИРН („Призма“).