На протестот присуствуваше и Љупчо Ѓорѓиески, таткото на 26-годишната Сара, која неодамна беше претепана од нејзиниот партнер. Пред присутните покажа фотографија од повредената ќерка и порача дека ниту еден родител не треба да помине низ такво искуство
„Не сакаме да чекаме да биде предоцна“ е една од пораките што ги упатија учесниците на денешниот протест во Охрид против фемицидите, родово базираното насилство и институционалните пропусти во заштитата на жените.
Протестот, најавен преку инстаграм-профилот „Охрид не молчит“, започна на градскиот плоштад „Св. Климент Охридски“. Учесниците продолжија низ Охридската чаршија до Секторот за внатрешни работи (СВР) Охрид, а потоа по булеварот „Македонски просветители“ до Основниот суд, каде што беше прочитана порака од протестната поворка.

Овој протест доаѓа по случајот со 26-годишната охриѓанката Сара кој беше претепана од нејзиниот партнер, а од силината на ударите таа изгубила свест и паднала, по што била хоспитализирана со тешки телесни повреди.
Учесниците на протестот посочија дека станува збор за граѓанска иницијатива без политичка заднина, чија цел е да се крене гласот против насилството и да се побара од надлежните институции посериозен пристап кон проблемот.
На протестот присуствуваше и Љупчо Ѓорѓиески, таткото на 26-годишната Сара, која неодамна беше претепана од нејзиниот партнер. Пред присутните покажа фотографија од повредената ќерка и порача дека ниту еден родител не треба да помине низ такво искуство.

„Ова е ќерка ми Сара. Ниту еден родител да не го види вакво своето дете и да не го доживее тоа што ни се случи на нас“,
порача Ѓорѓиески, кој со своето присуство го поддржа барањето за поголема заштита на жртвите од насилство.
За нападот е обвинет нејзиниот партнер Кристијан Корабоски, кому му е определен 30-дневен притвор.
Почетокот на судењето е закажан за 27 ноември во Основниот суд во Охрид.
Дел од учесничките на протестот посочија и дека неодамнешните случаи на насилство биле дополнителен поттик граѓаните да излезат на улица и да побараат поголема безбедност.
Една од нив упати апел до носителите на власта да преземат конкретни мерки, нагласувајќи дека надлежните служби треба да работат во интерес на безбедноста на граѓаните.
Како показател за зголеменото чувство на несигурност, таа го посочи и фактот дека во станбената зграда во која живее речиси сите станови имаат блиндирани врати, за разлика од порано.
Друга учесничка порача дека на жртвите им се потребни поддршка, насоки и помош за да се справат со насилството, но и ефикасно процесуирање на случаите, за да се обезбеди нивната заштита и да се спречи повторување на насилството.
Според неа, насилството во Македонија добива размери на епидемија.
Вчера во организација на иницијативата „Ниту една повеќе“ се одржа протест пред Владата.
