Првиот предлог на ВМРО-ДПМНЕ е вишоците струја што ги произведува АД ЕСМ, кои се јавуваат во текот на ноќта и викендот, да му бидат отстапени на стопанството, и тоа од 1 ноември до крајот на кризната состојба
Антикризните мерки во вредност од 350 милиони евра за справување со енергетската и економската криза кои Владата ги предложи вчера, според лидерот на ВМРО-ДПМНЕ, Христијан Мицкоски, се задоцнети, недоволни и не се однесуваат на компаниите. Поради тоа, како што посочи првиот човек на партијата денеска на прес-конференција, ВМРО-ДПМНЕ предлага пакет мерки за стопанството, компаниите и граѓаните за кои се надева дека ќе бидат разгледани од Владата и прифатени.
Првиот предлог на ВМРО-ДПМНЕ е вишоците струја што ги произведува АД ЕСМ, кои се јавуваат во текот на ноќта и викендот, да му бидат отстапени на стопанството, и тоа од 1 ноември до крајот на кризната состојба. Цената, според Мицкоски, нема да надмине 80 евра за мегават-час и се работи за 200 до 250 илјади мегават-часа. Според него, за ова да се оствари треба да се интервенира во два закони бидејќи недела е неработен ден, за да може работодавачите да одберат кој ден од неделата би го користеле за слободен ден.
Втората мерка е секоја компанија што ќе плати цена на струја за мегават-час над цената на регулираниот пазар, половина од разликата да ја преземе државата со субвенција. Според калкулации на ВМРО-ДПМНЕ, станува збор за педесетина милиони помош кон стопанството за да не ни случи колапс.
Мицкоски предложи како мерка викенд без ДДВ за основните прехранбени производи, интервенција во Законот за личен доход за што ќе поднесат измени во Собранието, да се одложи скалестото оданочување од 1 јануари 2023. Последната мерка се однесува на „дестерелизирање на благајничките записи во Народната банка“.
Лидерот на ВМРО-ДПМНЕ истакна дека државата не е само во енергетска, туку и во економска криза.
„Пакетот мерки нема ништо со што ќе се заузда растот на цените на храната, плаќаме најскапа струја во регионот“,
рече Мицкоски оценувајќи дека вчерашниот пакет мерки промовиран од Владата е симболичен и недоволен и „гол маркетиншки трик“.