Мерката пофаќа корисници на социјална помош, родители на деца со попреченост, самохрани родители и невработени… Во сетот антикризни мерки се опфатени и пензионерите со најниски пензии кои ќе добијат по 6 000 денари помош во наредните четири месеци односно по 1 500 денари месечно. Пакетот помош ги опфаќа и училиштата, болниците, општините, но и приватниот сектор
Владата на денешната седница донесе нов сет на антикризни мерки во вредност од 350 милиони евра за справување со енергетската криза. Премиерот Димитар Ковачевски на денешната прес-конференција истакна дека со новиот пакет севкупната поддршка досега во 2022 година за полесно пребродување на кризата во сите сфери досега изнесува 750 милиони евра. Дел од мерките ги опфаќаат социјално ранливите категории граѓани, невработените и пензионерите со ниски примања. Според планот, околу 42 илјади граѓани во наредните четири месеци ќе добиваат по 3 илјади денари.
„Тука спаѓаат лицата кои користат право на социјална сигурност, лица кои користат право на попреченост, родители на деца со попрченост до 26 годишна возраст, лицата со потешки трајни промени во здравстевната состојба, самохрани родители како и невработени. За оваа мерка се издвоени над 8 милиони евра.“
изјави Ковачевски.
Над 12 милиони евра се издвојуваат и за пензионерите кои земаат пензии до 14 илјади.
„Директна финансиска поддршка од вкупно 6 000 денари во наредните 4 месеци (1 500 денари месечно) има и за пензионерите кои земаат до 11 525 пензија, а тоа се над 91 600 пензионери наши сограѓани. Воедно, директна финансиска помош од вкупно 3 000 денари обезбедивме за пензионерите кои земаат пензија од 11 525-14 000 денари, односно над 66 000 пензионери“,
рече Ковачевски.
Училиштата на регулираниот пазар за струја, болниците ќе се снабдуваат преку ЕСМ
Во пакетот мерки, според презентацијата на Ковачевски, се обезбедува поддршка за училиштата и здравствените установи.
Основните и средните школи ќе се вклучат на регулиран пазар за снабдување со електрична енергија што, наведе премиерот, значи поддршка за вкупно 365 основни и 109 средни училишта, за што се обезбедени над милион евра.
„Овозможуваме снабдување на јавните здравствени установи со електрична енергија преку продажба од ЕСМ по далеку поповолна цена од пазарната цена“,
рече премиерот за болниците.
Преку ЕСМ продажба по поволна цена од берзанската, додаде тој, ќе се обезбедува и снабдување со електрична енергија на мерни станици за водни пумпи, преку ЕСМ продажба по поволна цена од берзанската цена. Не смееме да дозволиме, рече Ковачевски, во општините каде што се снабдуваат со вода преку пумпи, граѓаните да останат без вода.
Повеќе компании ќе може да ја користат кредитно-гарантната шема на Развојна банка
На прес-конференцијата во владата, премиерот наведе дека со пакетот мерки не е заборавен ниту приватниот сектор – микрон, малите и средните компаниите.
За таа цел, како што посочи, се проширува опсегот на компании кои се корисници на кредитно – гарантната шема од Гарантниот фонд на Развојната банка. Тоа ќе се направи на тој начин што ќе се олеснат критериумите за аплицирање за обезбедување на обртни средства за што се предвидени околу пет милиони евра.
„Обезбедуваме директна кредитна линија за поддршка на ликвидноста на микро, мали и средни трговски друштва (согласно тековната состојба) како и ТП, занаетчии кои плаќаат давачки на реален приход)“,
објасни Ковачевски.
Ќе се заврза и зголеми повратот на ДДВ. Што ќе се прави за помалку од 30 дена
„Обезбедуваме поволна консултантска поддршка за изработка на проекти / студии за инвестиции во енергетска ефикасност и обновливи извори на енергија со цел полесен пристап до капитал. Продолжуваме со кредити за инвестирање во проекти за енергетска ефикасност и обновливи извори на енергија со структура на финансирање 60-40 отсто, за што се одвоени 10 милиони евра“,
рече Ковачевски.
Дел од мерките ќе стапат на сила со одлука на Владата, но за дел од мерките ќе треба да се преточат во законско решение кое се очекува идната недела да влезе во собраниска процедура.