„Постапката е јасно дефинирана. Институцијата каде што работи лицето доставува барање до Дирекцијата за безбедност на класифицирани информации, по што се спроведуваат потребните проверки. А тие проверки за цивилни лица ги спроведуваат АНБ и МВР, а не НАТО. Значи, во случајот со Бојан Христовски, токму АНБ каде што тој е именуван за директор поднела барање и токму АНБ спровела безбедноста проверка на својот директор. Ова ја открива целата манипулација на власта“, рече портпаролката на СДСМ на денешната прес-конференција
На нејзините тврдења веднаш реагираа од владејачката ВМРО-ДПМНЕ, од каде што преку писмено соопштение, меѓу другото, потсетија дека Антикорупциска не виде причина за постапка за Христовски и дека директорот на АНБ има сертификат според сите стандарди
Информацијата што изминатите денови ја објавија дел од медиумите дека новиот директор на Агенцијата за национална безбедност (АНБ), Бојан Христовски, добил и поседува безбедносен сертификат од НАТО, опозицискиот Социјалдемократски сојуз денеска ја оцени како последна манипулација сервирана од власта со цел да се избегнат суштинските прашања во врска со поставувањето на Христовски на чело на АНБ.
Откако беше објавено во дел од медиумите, кои се повикаа на свои извори во Дирекцијата за безбедност на класифицирани информации, дека добил позитивно мислење за НАТО-сертификат во изјава за ТВ 24 на 3 јануари потврдил и самиот Христовски.
„Можам да потврдам дека е обезбедено позитивно мислење за издавање на НАТО безбедносен сертификат, а сето тоа согласно процедурата во која се инволвирани повеќе институции. Процесот на проверки започна пред околу два месеци, а заврши пред десетина дена“,
изјавил за телевизијата директорот на Агенцијата задолжена за националната безбедност и контраразузнавањето.
Портпаролката на СДСМ, Богданка Кузеска, денешната прес-конференција ја посвети на оваа тема велејќи „скандалот со киднапирањето на Агенцијата за национална безбедност и партиското назначување директор нема крај“.
„Последната манипулација којашто власта ја сервира е дека Христовски наводно поседувал сертификат од НАТО. Ова е намерна манипулација за да се одбегнат одговорите на суштинските прашања а тоа е дали Христовски воопшто ги исполнува условите да биде на оваа висока позиција. СДСМ ќе ја разобличи оваа манипулација и ќе инсистира на правна разрешница на овој случај“,
рече Кузеска.
Во таа насока, таа наведе дека проверките за издавање безбедносни сертификати ги вршат исклучиво домашните безбедносни институции, а тоа се, како што посочи, АНБ и Министерството за внатрешни работи.
„Постапката е јасно дефинирана. Институцијата каде што работи лицето доставува барање до Дирекцијата за безбедност на класифицирани информации, по што се спроведуваат потребните проверки. А тие проверки за цивилни лица ги спроведуваат АНБ и МВР, а не НАТО. Значи во случајот со Бојан Христовски, токму АНБ каде што тој е именуван за директор поднела барање и токму АНБ спровела безбедноста проверка на својот директор. Ова ја открива целата манипулација на власта“,
рече портпаролката на СДСМ.
Околу именувањето на Христовски за директор на АНБ, како што посочи таа, сè уште постојат неодговорени прашања, од валидноста на неговата факултетска диплома, добивањето на сертификатот за пристап до податоци кои ја носат ознаката „државна тајна“, до она за ТОЕФЛ-сертификатот за познавање на англискиот јазик.
Прашањето, рече Кузеска, е зошто по сите можни скандали, власта по секоја цена го турка и ревносно го штити Христовски.
„Христовски беше именуван за директор на АНБ без соодветен безбедносен сертификат од ниво ‘државна тајна’. Согласно член 10 став 1 од Законот за АНБ безбедносниот сертификат е услов за да биде именуван за директор. Сè уште е отворено прашањето и за сертификатот за англиски јазик од Пловдив Бугарија, од непосточека агенција. Отворено е и прашањето за валидноста на дипломата на Христовски. Одлуката на ДКСК е целосно компромитирана и затоа Јавното обвинителство не смее уште да молчи. ДПМНЕ создава паравласт, ги крши законите за да ги партизира безбедносните институции. СДСМ ќе продолжи да инсистира на целосна транспарентност и правна разрешница за овој случај“,
порача портпаролката на СДСМ.
На прес-конференцијата на Кузеска реагираа од владејачката ВМРО-ДПМНЕ, од каде што излегоа со контраобвинување дека СДСМ е тој кој ставил печат на се што подразбира партизација во државата, но и, како што додаваат, пошироко во општеството
„СДС партизираше се по ред, а во последните седум години владеење ги имаше докажаните партиски кадри во судството, како судиите Дамева и Георгиев, обвинителката Русковска и ова се имиња само за илустрација. СДС не ги остави на страна ниту безбедносните служби, па така тука ги имаше докажаните партиски кадри како Димовски, Муслиу, Зечевиќ. И ова се само неколку од низата партијци во безбедносните служби. Сега ВМРО-ДПМНЕ работи на професионализација на службите и тоа на сите по ред. ВМРО-ДПМНЕ има кадри за кои од институции е потврдено дека се соодветни на функциите кои ги вршат. Да потсетиме, Антикорупциска не виде причина за постапка за Христовски, а Христовски има сертификат според сите стандарди“,
се вели во писмената реакција од ВМРО-ДПМНЕ.
За многубројните прашања што се наметнаа по назначувањето на Христовски за директор на Агенцијата за национална безбедност досега со свој заклучок и одлука излезе само Државната комисија за спречување на корупција (ДКСК), што наместо да затвори отвори нови прашања. Според антикорупционерите, Христовски на функцијата бил именуван согласно законските услови: Тие одлучија да ја запрат и архивираат постапката по иницијативите со кои се спореше неговото именување.
Комисијата се прогласи за ненадлежна да одлучува, односно да врши директна експертиза на ТОЕФЛ-сертификатот на Христовски за познавање на англискиот јазик, како и за дипломата од Економскиот факултет при Универзитетот за туризам и менаџмент во Скопје, а кои предизвикаа најголемо внимание во јавноста, особено сертификатот издаден во Пловдив, Бугарија.
Во врска со одлуката на Антикорупциска во фокусот на јавноста се најде членката на Комисијата, Цвета Ристовска, која го реферираше предметот на седницата и им предложи на своите колеги, а тие едногласно прифатија да го затворат предметот за Христовски.
Членката на Антикорупциска, Цвета Ристовска која го реферираше предметот пред Комисијата, а таа едногласно прифати да го затвори се најде во фокусот на јавноста откако беше објавено дека таа била ангажирана на истиот Универзитет од каде е и дипломата на Христовски.
Од ДКСК ги отфрлија сомнежите за судир на интереси во случајот, а претседателката на Антикоруписка, Татјана Димитровска, бранејќи ја Ристовска рече дека таа побарала да биде изземена од предметот за Хирстовски, но нејзиното барање не било прифатено од мнозинството членови.
Во врска со сертификатот за познавање на англиски јазик на директорот на АНБ, издаден од училиште „Јулија Ко.“ од Пловдив, Бугарија, претседателката на ДКСК неодамна во телевизиско гостување рече дека тие во ниту еден момент не рекле дека тој е валиден, туку укажале оти не се надлежни да ја утврдат неговата веродостојност.
Надлежен да го стори тоа, како што кажа таа, е Јавното обвинителство каде е отворен предмет по поднесена кривична пријава. Нивното, рече Димитровска, тие го завршиле.
Инаку, „360 степени“ објави серија стории во врска со спорниот ТОЕФЛ-сертификат на Христовски, издаден од училиште „Јулија Ко.“ од Пловдив, Бугарија.
Од судски пресуди, во кои имавме увид, произлезе дека две директорки на јавни уставнови, по признание на вина, биле осудени на условни казни од две години затвор поради тоа што употребиле докумнет со невистина содржина, односно ТОЕФЛ-сертификти токму од „Јулија Ко.“ од Пловдив.
Случајот со двете директорки завршил на суд по кривична пријава од Министерството за внатрешни работи (МВР) во време кога со него раководеше Панче Тошковски.
Бевме и во Пловдив. Но, таму го немаше ниту училиштето ниту, пак, неговите сопственици. Дополнително, според документите достапни во бугарскиот трговски регистар, утврдивме дека фирмата „Јулија КО“ нема деловна активност најмалку од 2019 г. наваму, така што не би можела да издаде сертификат во 2022 г. од кога датира оној на Бојан Христовски.
„360 степени“ дојде и до „Упатство за спроведување на фаза 1 – административна селекција во делот на проверка на поседување на меѓународно признати сертификати за познавање на еден од трите најчесто користени јазици во Европската Унија“ од декември 2019 г. Во документот на Агенцијата за администрација има листа на признаени тестови и испитни центри во земјава и регионот.
Го има и Пловдив, но единствениот овластен испитен центар е друго правно лице кое нема никаква врска со „Јулија Ко.“. Станува збор за приватното училиште „Класик“.
Во меѓувреме, дека отвориле предмет за ТОЕФЛ-сертификатот на Христовски ни потврдија и од МВР и од Јавното обвинителство на Република Северна Македонија. Од Обвинителството велат дека преку меѓународна правна помош се обратиле до бугарските власти за да ги обезбедат потребните информации по официјален пат.