Зборувајќи за плановите за 2023-та, лидерот на СДСМ вети изградба на автопатишта, зауздување на инфлацијата, раст на пензиите и просечната плата
Пред партиското членство, Ковачевски порача и дека ќе им се заблагодари на оние што не ги исполнуваат обврските кон граѓаните бидејќи нема намера, како што рече, за малкумина да загрози сè што е направено и да остави простор за популисти и лажни патриоти
Во говорот Ковачевски не ја заборави опозицијата. ВМРО-ДПМНЕ и Христијан Мицкоски ги нарече заложници на Левица. И едните и другите, рече, личат како јајце на јајце, имаат лошо однесување и се обидуваат да печалат поени со пцости, со закани, со влечење по улици и бришење подови. Тој ги спомена и состојбите во Скопје како пример дека опозицијата не ја бидува кога е на власт
Во однос на надворешната политика, тој порача дека лидерство значи да се носат тешки одлуки и кон присутните се обрати со прашања за тоа кој можел да верува дека во една година МПЦ ќе биде признаена, дека македонскиот јазик ќе биде потврден во ЕУ со договорот за ФРОНТЕКС, дека во Грција ќе се регистрира Центар за македонски јазик
Лидерот на СДСМ и премиер, Димитар Ковачевски, од вечерашната национална партиска трибина „Силно и одлучно за иднината“, вети дека нема да има зголемување на струјата, а за малите компании цената ќе се намали.
Меѓу ветувањата за наредната 2023 година, кој тој ги даде на партискиот собир кој се поклопува и со годишнината од неговото застанување на лидерската позиција во СДСМ, Ковачевски најави и зауздување на инфлацијата, нови странски инвестиции, зголемување на платите.
„Во следната година продолжуваме уште поинтензивно. Пензиите ќе ги зголемиме два пати, минималната плата повторно ќе расте, како и просечната плата. А, во многу сектори предвидени се и дополнителни зголемувања на платите. Невработеноста и во услови на криза ќе продолжи да се намалува, очекуваме и нови странски инвестиции и нови работни места. Цената на електричната енергија за домаќинствата, порачувам оттука, нема да се зголеми, а за малите компании ќе се намали. И очекуваме намалување на цените на прехранбените производи и зауздување на инфлацијата идната година“,
рече Ковачевски.
Тој зборуваше и за инфраструктурните проекти од кои најголем дел од плановите што ги наброја се однесуваа на автопатиштата. Конечно, во 2023-та вети дека ќе започне изградбата на Коридорот 8 – автопатот од Тетово до албанската граница, како и на Коридорот 10Д – автопатот од Прилеп до Битола.
„Планираме и завршување на целокупната национална гасоводна мрежа. Пред нас е стабилна, развојна и година на фокус. Нудам и барам национално обединување за државните и националните приоритети. Подготвен сум со сите искрени и добронамерни фактори на сите нивоа да разговараме и заеднички да креираме решенија. Време и место за евтин популизам и политика не треба да има и на такви популисти нема да губиме енергија“,
рече лидерот на СДСМ.
Ковачевски најави дека ќе им се заблагодари не неефикасните и нечесните: Немам намера заради малкумина да загрозам се
Во својот говор, Ковачевски зборуваше и за кадровските решенија. За себе порача дека не бега од обврските да ја води државата до полноправно членство, а на останатите им рече дека ако заборавиле на обврските што ги имаат кон граѓаните ќе им се заблагодари.
„Тие што нашите обврски кон граѓаните ги заборавиле или не ги исполнуваат, одговорно ви велам дека ќе им се заблагодариме. Ниту имаме можност ниту смееме, ниту ќе дозволиме толеранција кон неефикасност, неспособност и нечесност. Јавно кажувам дека мора да има ред, знаење и работа. Мора да има дисциплина. Немам намера заради малкумина да загрозиме сè што е направено, сè што треба да се на направи во оваа држава и да оставиме простор за популисти и лажни патриоти кои би продале се, би сториле се, и би растуриле се за пари и фотелји. Јас ќе водам и ќе барам поголема солидарност, сплотеност и одговорност од сите затоа што за сите такви има место во СДСМ“,
порача Ковачевски.
„Во Брисел ќе седнеме како Македонци, кој не верува, нека се тргне на страна“
Во говорот кој траеше 40-тина минути тој зборуваше и за интеграциите во ЕУ за што рече дека е особено горд што после 17 години чекање успеавме да ги почнеме преговорите. Не беше лесно, рече, но посочи дека лидерството значи да се носат и тешки одлуки. И од овој партиски настан тој повтори дека во препреките кон ЕУ и преговорите со Бугарија го имал чувството како некој со нож да го сече стомакот.
„Често зборувам јас за тоа тешко чувство кое верувам многумина го имале. После сè што се изнаслушавме во текот на летото, целата хистерија која беше направена, тоа чувство го имавте и вие во оваа сала и голем дел од граѓаните. Истото чувство го имав и јас. Тоа беше чувство како со нож некој да ви го сече стомакот. Но, јас немав право на дилема, на лично мислење или дневни емоции. Јас имав само обврска, многу тешка обврска, да го креираме најмалку болниот компромис, за да ја спроведеме зацртаната стратешка цел на државата од пред 30 години“,
посочи Ковачевски.
Многумина во тие моменти, рече тој, му велеле да се откаже и да дигне раце бидејќи ЕУ не нè сака.
„Е драги мои, првпат пред сите ќе го кажам тоа што го знаат моите најблиски соработници! На сите им реков! Може да успееме! Да бидеме Македонци, и како такви да седиме на големата маса во Брисел! Кој не мисли дека тоа е возможно, нека се тргне на страна! Јас одлуката ја донесов, бидејќи знам дека таа е најдобра за државата и за нашите сегашни и идни поколенија“,
рече лидерот на СДСМ.
Според него, политиките на владата што ја предводи СДСМ довеле до тоа да имаме заштитен македонски јазик и црква признаена од сите.
„Кој можеше да претпостави дека во една година ќе биде признаена Македонската православна црква, дека македонскиот јазик ќе е потврден во ЕУ со договорот за ФРОНТЕКС, прв документ каде имаме ставено наш потпис заедно со останатите 27 земји членки на ЕУ, на македонски јазик, без никакви појаснувања, додавки и фусноти? Чист македонски јазик, во ЕУ. Кој можеше да претпостави дека тој договор ќе биде потпишан од сите земји членки и истовремено одобрен и од Грција и од Бугарија? Кој можеше да претпостави дека во Грција ќе се регистрира Центар за македонски јазик? Дека нашата медиумска информативна агенција ќе отвори своја канцеларија во Софија? Е тоа се придобивките од државничките одлуки“,
рече Ковачевски.
„Пироманските политиките“ на ВМРО-ДПМНЕ и Левица се реална закана, смета премиерот
Во говорот, лидерот на СДСМ не ја „заборави“ ниту опозицијата. ВМРО-ДПМНЕ и Христијан Мицкоски повторно ги нарече заложници на Левица. Нивната цел, вели Ковачевски, е да запалат оган, за да мислат луѓето дека им е топло, а при тоа да не забележат дека горат токму нивните чевли.
„Овие пиромански политики се реална закана за земјата, за сегашните и идни генерации, закана да се попречи европскиот пат, а државата да се врати во неизвесност и изолација, во внатрешни поделби на народот“,
оцени Ковачевски.
Тој додаде дека за опозицијата сè што е демократска институција, дебата, контрола, аргументи е најголем непријател, бидејќи немаат ниту знаење, ниту аргументи и го користат народот како свој штит.
„Постојано создаваат кризи. Кога се опозиција доволно е на граѓаните да им понудат лаги и омраза. Кога се власт – мора и нешто повеќе. Е за тоа не ги бидува. Погледнете го само примерот на Скопје и сè ќе ви биде јасно. За само една година, направија пепел, комплетно го блокираа животот и развојот во градот. И повторно, прават кризи, растурања, блокади. Впрочем, само тоа и го знаат најдобро, покрај криминалот“,
рече Ковачевски.
Тој ја искритикува опозицијата и дека само нуди лесни и лажни одговори на тешки прашања, но никако не сака да помогне и оцени дека на противниците важни им се само две работи – фотелјата и парите и за нив ништо друго не постои.
„И едните и другите ги спојува пристапот на создавање на внатрешни и надворешни непријатели. А демек, тие биле народот. И ниту еднаш не понудија аргументи, рационални причини, логика. Но затоа, секој ден сејат само лаги, стравови, црнила – за да го остварат својот интерес. И не треба да ги анализирате премногу, и едните и другите, и наводно леви, и наводно десни – личат како јајце на јајце. Имаат лошо однесување. Се обидуваат да печалат поени со пцости, со закани, со влечење по улици и бришење подови“,
нагласи Ковачевски.