Колона транспортери со свирежи денеска направија обиколка на скопските улици и се собраа пред Владата на протест против зголемената акциза на горивата. Владата донесе уредба со законска сила со која ја покачи за три денари цената на акцизата на нафтените деривати. Протестот е во организација на членовите на „Макамтранс“ кои реагираат дека во услови на криза и намален обем на работа оваа дополнителна давачка им создава дополнителни трошоци и загуби во работењето. Сепак, со ваквиот став не се согласуваат сите транспортери. Како што објави „Дојче веле“, асоцијацијата АМЕРИТ, која застапува товарни и патнички оператори, не го поддржа протестот, бидејќи сметаат дека тоа нема да помогне за излез од кризата. Ова, според АМЕРИТ, бил став на дури 80% од транспортните фирми што ги контактирале:
„Контактиравме над 1000 транспортни фирми и бевме изненадени дека најголемиот дел, околу 80 проценти, иако погодени од состојбата, нема да поддржат протест, бидејќи сметаат дека нема да се постигне посакуваниот ефект. Сепак, ова повлекува барање за подетално образложение на ефектите од оваа мерка во јавноста, на транспарентен начин, но и гаранции за намената на собраните средства и нивна распределба онаму каде што е потребно, не изоставувајќи го товарниот транспортот, но и патничкиот превоз, кој бележи пад од 100 отсто од почетокот на пандемијата“,
реагираат од АМЕРИТ.
Уредбата за зголемување на акцизата е донесена минатата недела и со неа се пропишува износот на акцизата за безоловниот бензин, дизел-горивото и горивото за греење.
„Уредбата е донесена за да се ублажат економските последици од зголемените трошоци за справување со коронавирусот и обезбедување средства за редовно сервисирање на буџетските потреби. Зголемувањето на износот на акцизата нема да предизвика дополнителни финансиски импликации за правните субјекти и населението со оглед на фактот дека значителниот пад на цената на нафтата на светските берзи предизвикува значително намалување и на малопродажните цени на горивата во нашата држава“,
рече портпаролот на Владата Мохамед Хоџа минатата недела.
Предложениот механизам, појасни тој, овозможува постепено враќање на постојните износи на акцизи во услови на нормализирање на цените на пазарот, што, како што рече, се очекува тогаш кога ќе заврши состојбата предизвикана од коронавирусот.
Од денеска пониски цени на горивата
Од денеска цената на дизелот се намалува за 4 денари и новата цена изнесува 42 и пол денари за литар.
Цената на ЕУРОСУПЕР 95 се намалува за два и пол денари, па литар 95-октански бензин чини 49,50 денари. Цената на ЕУРОСУПЕР 98 се намалува за 2 денари и еден литар се продава за 52 денара.
Цената на Екстра лесното масло за домаќинство се намалува за 3,5 денари и изнесува 30,5 денари.
За 2,178 денари за килограм се намалува и малопродажната цена на мазутот кој ќе чини 16,945 денари.
Од РКЕ објаснуваат дека причина за поевтинувањето е падот на цената на бензините на светскиот пазар за околу 24,55 отсто, на дизелот за околу 31,9 отсто, како и за 0,665 отсто повисокиот курс на денарот во однос на доларот во изминатите седум дена.