В среда прегласување на седум избирачки места во петтата и шестата изборна единица

Прегласување ќе има на по две избирачки места во општините Долнени и Крушево и на по едно место во Струга, Охрид и Желино

На седум избирачки места, во петтата и шестата изборна единица, в среда ќе има прегласување за парламентарните избори. Државната изборна комисија (ДИК) одлуката за прегласување ја донесе откако Управниот суд ги одби како неосновани сите седум тужби поднесени од коалицијата „Европски фронт“ поднесени против решенијата на ДИК поврзани со изборите одржани на 8 мај.

Прегласување ќе има на по две избирачки места во општините Долнени и Крушево и на по едно место во Струга, Охрид и Желино.

Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица. Прегласувањето на тие избирачки места може да влијае на конечните резултати од гласањето.

Поради ваквата одлука на Управниот суд и на ДИК, од ДУИ обвинија дека се прави изборен инженеринг со цел на партијата да ѝ се одземат две освоени пратенички места.

ДУИ во саботата одржа состанок на Претседателството на кој била донесена одлука ставот во врска со прегласувањето на седум избирачки места за парламентарните избори да биде изграден заедно со сите партии од „Европскиот фронт“.

Ставот за прегласувањетo на седум избирачки места ДУИ ќе го формира со коалициските партнери од „Европски фронт“

Пред состанокот, лидерот ДУИ, Али Ахмети, истакна дека ќе прават анализа на одлуките на ВМРО-ДПМНЕ и СДСМ за да се повторат изборите на неколку изборни места.

Направена е неправда на „Европскиот фронт“, одлуката за прегласување ќе се дискутира на состанокот на ДУИ, рече Ахмети

Од „Европскиот фронт“ во петокот преку соопштение реагираа на одлуките на Управниот суд и ги повикаа институциите да постапат согласно законите, без партиски и политички директиви од која било партија, со цел, како што пишува во соопштението, да се заштити кредибилитетот на изборниот процес без да се стави дамка на волјата на граѓаните.

„Европски фронт“: Се врши политички притисок врз Управниот суд од страна на лидерите на опозицијата кои ги изгубија изборите

Од коалицијата „Вреди“ ја поздравија одлуката оценувајќи дека е во согласност со волјата на граѓаните.

Претседателот на Управниот суд, Бурим Сејдини, пак, се пожали дека е жртва на клевети и ги оцени како неосновани инсинуациите дека тој прави притисок врз колегите како да гласаат.

Изјавите дека вршам притисок врз колегите судии ги ценам како клевета на мојата работа, вели претседателот на Управниот суд

Неговата реакција следуваше по изјавите на лидерот на Алијанса за Албанците, Арбен Таравари, дел од коалицијата „Вреди“, дека Сејдини врши притисок врз судиите кои одлучуваат за тужбите од коалицијата „Европски фронт“ против решенијата на Државната изборна комисија за поништување на гласањето на парламентарните избори во одредени избирачки места.

Претходно и мнозинството членови на ДИК испратија писмен допис потенцирајќи дека се загрижени за неоснованите јавни политички притисоци и закани за кривична одговорност поради нивните одлуки по приговорите за парламентарните избори. Покрај претседателот на Комисијата, Александар Даштевски, потпишани се членовите Радица Ристеска, Оливер Ристоски, Борис Кондарко, Бобан Стојановски и Абдуш Демири, со исклучок на потпретседателката на ДИК, Дитмире Шеху, која не е потпишана на реакцијата.

Членовите на ДИК, без потпретседателката Шеху, реагираат дека се цел на политички притисоци и закани

Реакцијата на ДИК следуваше по низата обвинувања од „Европскиот фронт“ од каде што излегоа со став оти на членовите на ДИК им бил извршен политички притисок преку партиски инструкции во однос на приговорите.

По прегласувањето во петтата изборна единица, лидерот на ВМРО-ДПМНЕ, Христијан Мицкоски, вчера рече дека очекува мнозинство во парламентот од 62 пратеници. Тоа, според него, би било историска можност.

Мицкоски по прегласувањето очекува 62 пратеници, најавува историски реформски процес во државата