Согласно уставната положба која на Уставниот суд му обезбедува да се дистанцира од секаков политички авторитет, Судот укажува дека е недозволиво за член на Владата како носител на извршната власт јавно да ги доведува во заблуда граѓаните со изнесување на произволни констатации и невистини во врска со работењето на Уставниот суд, се вели во реакцијата од судот
На реакцијата на Уставен суд, одговор испратија од Министерството за правда каде се вели дека министерот Лога не може да ја сфати нервозата и вокабуларот искористен во реакцијата на почитуваниот Уставен суд
Неточни се тврдењата на министерот за правда Кренар Лога дека од Уставниот суд е побарано мислење во која било форма за понатамошно постапување со издавање на изводите бидејќи нема пристигнато таков допис ниту од Управата за водење на матични книги ниту пак од Министертвото за правда, информираат од Уставниот суд.
Од Уставниот суд реагираат на, како што велат „невистинитите и неточни тврдења“ искажани од страна на министерот за правда Кренар Лога на телевизија Сител, кој „погрешно ја информира јавноста во врска со т.н. Упатство за водење на матичните книги“.
„Согласно уставната положба која на Уставниот суд му обезбедува да се дистанцира од секаков политички авторитет, Судот укажува дека е недозволиво за член на Владата како носител на извршната власт јавно да ги доведува во заблуда граѓаните со изнесување на произволни констатации и невистини во врска со работењето на Уставниот суд“,
се вели во реакцијата.
Во интерес на зачувување на достоинството и угледот на Судот како единствена институција со такви надлежности, информираме дека Уставниот суд комуницира преку своите акти, но во никој случај не е дел од формалната процедура Судот да врши консултација со кој било учесник во постапката и да советува откако ќе биде донесена одлука.
„Уставниот суд нема надлежност да кажува кои се идните чекори по донесени одлуки, затоа што доносителите на актите имаат обврска да ги решаваат проблемите“,
се вели во реакцијата на Уставен суд.
На реакцијата на Уставен суд, одговор испратија од Министерството за правда каде се вели дека министерот Лога не може да ја сфати нервозата и вокабуларот искористен во реакцијата на Уставен суд.
„Министерот Лога на новинарско прашање вели дека Управата за водење матични книги (УВМК) има побарано мислење и од Уставен суд и од други институции, како и од делот на експертите. Како што е пренесено до министерот, со Уставен суд комуникацијата е реализирана на неформален начин (заради тоа што до вчера актот на Уставен суд не беше објавен во ‘Службен весник’) и токму поради ова, добро е Уставниот суд да не брза со квалификации, туку да ги прашува своите колеги“,
се вели во реакцијата од Министерството за правда.
Од друга страна, додаваат оттаму, со цел да се почитува законот и Уставот, директорот од УВМК има побарано писмено мислење од Министерството за правда и Секретаријатот за законодавство.
„Длабоко веруваме дека нашите 10+10 иницјативи не се причина за нервозата изразена кон нас. На почитуваниот Уставен суд му посакуваме успеси во нивна понатамошна работа“,
додаваат од Правда.
Од Министерството за правда вчера рекоа дека со цел да се гарантира уставноста и законитоста на прописите во државата и за сите да важат уставните рокови за објавување во „Службен весник“, министерот за правда Кренар Лога до Уставниот суд доставил иницијативи за оценување на уставноста и законитоста на прописи донесени од институции кои не го испочитувале рокот за објава во „Службен весник“.
Лога, 10 иницијативи доставил во име на Министерството за правда и 10 во свое лично име како граѓанин. Во вчерашното соопштение од Правда рекоа дека на потег се почитуваните судии од Уставен суд од кои, како што наведуваат, очекуваме да се произнесат за иницијативите со истата ефикасност, брзина и експедитивност како што постапија за Упатството за матичните книги на минатата отворена седница.
Во иницијативите од Министерството за правда е наведено дека во изминатиот период воочена е објава на повеќе прописи за кои постои уставна обврска за објава во ,,Службен весник на Република Северна Македонија”, а кои се објавени во спротивност со членот 52, односно не е почитуван уставниот рок од седум дена за објавување на прописите. Од судот, Лога исто така бара по службена должност да ја испита уставноста на прописите за кои не е почитуван уставниот рок од седум дена за нивно објавување.
Уставниот суд по службена должност на седница на 5 јули донесе одлука со која привремено го стави надвор од употреба упатството на министерот за правда Кренар Лога со кое се издава извод на родени во кој има графа за етничка припадност. Основната причина за поведување на постапката е пречекорување на рокот за потпишување – од потпишување, до објава во „Службен весник“. Министерот за правда го потпишал упатството на 29 мај, а во „Службен весник“ е објавено на 15 јуни.
Уставните судии изразија сомнеж во уставноста на ова упатство и покренаа иницијатива за проверка на законитоста. Додека одлучат за упатството на министерот, ќе важи времената мерка, односно во изводите нема да се става графата за етничка припадност.