На последниот пресек за состојбата на бројот на собраните потписи за кандидатите за претседател, заклучно со 4 март до 20 часот, може да се види дека за Ристов има нула потписи. Нема ниту информации за неговата биографија ниту, пак, зошто одлучил да се вклучи во трката за претседател, со оглед дека процесот на собирање потписи завршува в петок на 8 март
До Државната изборна комисија (ДИК) вчера била доставена уште една иницијатива од Гоце Ристов за собирање потписи за кандидатура за претседател на државата.
Од ДИК соопштија дека потписите за овој кандидат исто како и за другите ќе се собираат во подрачните одделенија или канцеларии на цела територија на државата.
На последниот пресек за состојбата на бројот на собраните потписи за кандидатите за претседател, заклучно со 4 март до 20 часот, може да се види дека за Ристов има нула потписи.
Инаку, нема ниту информации за неговата биографија ниту, пак, зошто одлучил да се вклучи во трката за претседател, со оглед дека процесот на собирање на потписи завршува во петок на 8 март.
Досега седум кандидати успеаа да го обезбедат своето место на изборите за претседател на државата.
Кандидатите за шеф на државата на СДСМ, Стево Пендаровски, и на ВМРО-ДПМНЕ, Гордана Силјановска-Давкова, за само еден ден, успеале да соберат над 20 илјади граѓански потписи за поддршка на своите претседателски кандидатури, што е двојно повеќе од потребниот минимум од 10 илјади потписи.
Според последните ажурирани податоци на Државната изборна комисија (ДИК), до вчеравечер за Силјановска-Давкова се потпишале 28 086 граѓани, а за кандидатурата на Пендаровски својот потпис го дале 22 411 лица.
Кандидатот чие име предизвика големо внимание во јавноста, Господин Попоски од Вевчани, досега успеал да обезбеди поддршка само од 133 граѓани.
Под илјада потписи досега имаат и независната кандидатка поддржана од Десна, Зорица Цветковска (вкупно 233), како и кандидатот Ѓoрѓи Манасков кому поддршка досега му дале 453 граѓани.
Манасков пред два дена на прес-конференција се пожали на нерегуларности и побара да се стопира целата постапка за собирање потписи.
Томе Николоски останува со 0 потписи, а самиот пред неколку дена објави дека се откажува од трката.
Потребните 10 000 потписи од граѓаните веќе ги собраа лидерите на ЗНАМ, Максим Димитриевски, актуелниот министер за надворешни работи Бујар Османи, кој е кандидат на ДУИ, кандидатот и претседател на ГРОМ, Стевче Јакимовски, Арбен Таравари, кандидат на коалицијата на албанските партии „Вреди“ и Билјана Ванковска, кандидат на Левица.
Рокот за собирање на потписите истекува на 8 март – на полноќ.
„360 степени“ објави дека голем број од оние подрачни канцеларии на ДИК што постојат или се во лоша состојба или се тешко достапни, а тоа значи дека голем број од граѓаните мора да патува и десетици километри за да дадат поддршка за некого од оние што се обидуваат да соберат десет илјади потписи за да изборат место на гласачкото ливче на 24 април.
Првиот круг од претседателските избори ќе се одржи на 24 април, а вториот на 8 мај, за кога се закажани и парламентарните избори.