Дека Зоран Милески познат по прекарот Кичеец, кој е на отслужување на казната за „Рекет“ во струшкиот затвор, е надвор од затворот се дозна откако викендов учествуваше во сообраќајна несреќа на патот Гостивар-Кичево, во која едно лице загина, а седум се повредени
На осудениот Зоран Милески му е одобрен 30-дневен прекин на издржувањето на казната затвор, поради влошена здравствена состојба, за која тој доставил и специјалистички извештаи од лекарски прегледи, во кои е наведено дека пациентот се јавил на преглед поради проблеми со срцето, градна болка, видлива агитираност… кои се јавиле после интезивен психички и физички стрес, објаснуваат денеска од Управата за извршување санкции, откако Милевски, кој е на отслужување на казната за „Рекет“ во струшкиот затвор, викендов учествуваше во сообраќајна несреќа на патот Гостивар-Кичево, во која едно лице загина, а седум се повредени.
Од Управата во соопштението велат дека Милески има решение од 10.08.2021 година со кое му е одобрен прекин на издржувањето на казната затвор во согласност со чл. 225 ст.1 од Законот за извршување на санкциите, и тоа во времетраење од 30 дена, и на 9.09.2021 година тој треба да се врати во затворот Струга на издржување на казната.
„Прекинот од 30 дена не му се засметува во вкупната казна затвор, а истиот му беше одобрен од причина што на Управата за извршување на санкции осудениот кон своето барање за одобрување на прекин поради влошена здравствена состојба, достави и специјалистички извештаи од лекарски прегледи извршени на 06.08.2021 година и на 09.08.2021 година во ЈЗО Завод за превенција, лекување и рехабилитација на кардиоваскуларни заболувања ‘Св.Стефан’ во Охрид. Во специјалистичките извештаи е наведено дека пациентот се јавил на преглед поради чувство на забрзана срцева работа, градна болка, дспинеја и видлива агитираност кои се јавиле после интезивен психички и физички стрес, еден час пред преглед. Пациентот поставен на хемодинамски мониторинг, ординирана терапија со amp.Presolol и amp.Cordarone и седација, после која дојде до нормализирање на срцевата фреквенција“,
се вели во соопштението., во кое се наведува и дијагноза „суправентрикуларна тахикардија“ и индицирани и закажани се ехокардиоградија, холтер EKG, Холтер ТА, колор доплер сонографија на каротидни артерии, KCT, а препишана е и соодветна терапија.
Кичеец е осуден на тригодишна затворска казна откако призна вина во случајот „Рекет“ каде се осудени и Бојан Јовановски – Боки 13 и Катица Јанева.
По правосилноста на неговата пресуда, тој лани во октомври влезе во Казнено-поправниот дом (КПД) Струга, а во моментов се наоѓа на 30-дневен прекин во извршувањето на казната. Како што вчера објаснија од Управата за извршување санкции, прекинот му е даден поради здравствени причини и трае до 8 септември.
Кичеец има одлежано повеќе од половина од казната, а затворот во Струга е од отворен тип што значи дека тој има право и секојдневно да излегува од затворот доколу е вработен, да користи викенд еднаш месечно, како и годишен одмор од 22 дена.