Проценките на американските, јужнокорејските и украинските разузнавачки служби велат дека Пјонгјанг испраќа околу 12 000 севернокорејски војници на фронтот
Украинските трупи првпат се судрија со севернокорејските единици кои неодамна беа распоредени за да ѝ помогнат на Москва во војната со Киев, изјави денеска украинскиот министер за одбрана Рустем Умеров.
Друг украински функционер изјави дека украинската армија пукала со артилерија врз севернокорејските војници во руската погранична област Курск.
Овие коментари се првите официјални извештаи дека украинските и севернокорејските сили се судриле.
„Украинските и севернокорејските трупи се вклучија во борби од мали размери кои го означија почетокот на директното учество на Пјонгјанг во војната во Украина. Севернокорејските војници беа измешани со руските војници и беа погрешно идентификувани на нивните униформи. Затоа е тешко да се каже дали има жртви од Северна Кореја“,
рече Умеров.
Тој посочи дека очекува пет севернокорејски единици, секоја со околу 3 000 војници, да бидат распоредени во регионот Курск.
Андриј Коваленко, шеф на одделението за борба против дезинформации во Советот за безбедност на Украина, изјави дека првите севернокорејски војници веќе биле гранатирани во регионот Курск.
Проценките на американските, јужнокорејските и украинските разузнавачки служби велат дека Пјонгјанг испраќа околу 12 000 севернокорејски војници на фронтот.
Пентагон вчера објави дека најмалку 10 000 севернокорејски војници се наоѓаат во Русија во близина на украинската граница.