Од Обвинителството, на чиј предлог Судот ја донел одлуката, велат дека поради кривичното дело и максималната можна казна мерката притвор на осомничениот може да трае најмногу три месеци
По три месеци поминати зад решетки, Стефан Димопвски, осомничен дека му помогнал на Љупчо Палевски-Палчо, првоосомничениот за убиствата на Вања Ѓорчевска и Панче Жежовски, да избега во Турција, ќе се брани од слобода откако Основниот кривичен суд Скопје му ја укинал мерката ефективен притвор.
Димовски беше осомничен за кривичното дело помагање сторител по извршување на кривично дело, според членот 365 став 3 од Кривичниот законик, затоа што го возел Палевски од Србија до Турција.
Информацијата за укинатиот притвор за „360 степени“ ја потврдија од Основниот кривичен суд Скопје, од каде што велат дека одлуката е донесена по предлог на надлежен јавен обвинител и заменета за со мерки за претпазливост.
„По предлог на надлежен обвинител за укинување мерка притвор за С.Д. и определување мерки за претпазливост, судија на претходна постапка му определи мерки забрана за напуштање живеалиште/престојувалиште, одземање патна исправа, обврска за јавување во суд и одземање, односно забрана за користење возачка дозвола“,
информираат од Кривичен.
Од Јавното обвинителство на РС Македонија на новинарски прашања во врска со предлогот на надлежниот јавен обвинител велат дека поради кривичното дело за кое е осомничен Димовски и максималната затворска казна притворот за него може да трае до три месеци.
„По истекот на тој рок, притворската мерка за осомничениот е заменета со соодветни мерки на претпазливост“,
велат од Обвинителството.
Инаку, истрагата за убиствата на Вања Ѓорчевска и Панче Жежовски ја води Основното јавно обвинителство Скопје и, како што последно информира шефот на ова јавно обвинителство, таа е во напредна фаза.
Димовски беше уапсен и му беше одреден притвор кратко по откривањето на грозоморното злосторство на почетокот на декември минатата година и по краткотрајниот притвор од 48 часа му беше одреден ефективен 30-дневен притвор, кој во два наврати беше продолжуван.
Според информациите на Обвинителството и Министерството за внатрешни работи, тој во периодот од 1 до 3 декември лани му обезбедил превоз, односно го возел Палевски од Србија, преку Бугарија до Турција.
Осомничениот со возило „ланд ровер“ со струмички регистарски таблички, во сопственост на фирма, се упатил кон Белград каде што се сретнал со Палевски, а потоа заедно се упатиле кон границата на Србија со Бугарија на граничниот премин „Калотина“.
„Границата ја поминале на 2.12.2023 година, па движејќи се низ територијата на Р. Бугарија истиот ден пристигнале на границата со Турција, граничен премин ‘Капитан Андреево’, и влегле во Турција. Таму биле заедно до 3.12.2023 година, по што сторителот останал, а сега осомничениот со возилото преку Грција се упатил кон државава каде бил приведен на граничниот премин ’Стар Дојран’“,
соопштија од Обвинителството на 7 декември минатата година кога информираа дека против Димовски е отворена истрага.
Првоосомничениот за убиствата на Вања и Панче, Љупчо Палевски-Палчо, и понатаму е во Турција каде што беше уапсен на 5 декември и во моментов се чека негова екстрадиција во земјава која надлежните во земјава очекуваат да биде реализирана бидејќи, како што неодамна изјавија од Министерството за правда, останува да бидат завршени уште административните процедури.
Покрај Палевски, за случајот осомничени се и Велибор Манев, Влатко Кешишов и Боре Видевски, кои се товарат за по две кривични дела – убиство и грабнување, како и таткото на Вања, Александар Ѓорчевски кој, според истрагата, помогнал во грабнувањето на девојчето откривајќи им ја на сторителите рутината на нејзиното движење. Нему неодамна му беше продолжен притворот за нови 30 дена.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Велес и на Скопје на 3 декември.
Според информациите од истрагата што на прес-конференција ги изнесоа министерот за внатрешни работи Оливер Спасовски и шефот на скопското Основно јавно обвинителство, Гаврил Бубевски, девојчето било грабнато во влезот од зградата во која живеела, а потоа во вреќа за спиење била ставена во гепек на возило и однесена на локација надвор од Скопје, каде што е убиена.
Убиството на велешанецот, пак, се случило пет дена претходно, односно на 22 ноември. Според информациите што беа досега соопштени, тој бил избран од осомничените поради неговиот автомобил, кој потоа бил користен при грабнувањето на Вања.
На 22 декември од Основното јавно обвинителство соопштија дека ги добиле обдукциските наоди од Институтот за судска медицина, за кои рекоа дека нема да бидат објавени во јавност.