Лидерите на СДСМ и на ВМРО-ДПМНЕ разменија тешки обвинувања, посебно за судските случаи што и на политички план ги обележаа последните три години
Жестоки реплики во однос на судските случаи што на политички план ги обележаа последните три години во земјава разменија вечерва лидерите на СДСМ и на ВМРО-ДПМНЕ Зоран Заев и Христијан Мицкоски, во нивното прво ТВ – соочување по распишувањето на предвремените избори.
Во дуелот на Канал 5, Мицкоски неколу минути го убедуваше Заев дека не го пријавил тој „Рекет“, односно дека не бил во Обвинителство за да поднесе пријава за случајот, како што е вообичаената процедура, туку дека ги викнал обвинителите во премиерскиот кабинет. Наспроти тоа, Заев тврдеше дека како најодговорен во владата лично го пријавил случајот „Рекет“, посочувајќи дека тоа е доказ дека завршило времето на селективна права и дека секој што се огрешил од законот ќе одговара.
Потоа, Заев го потсетуваше Мицкоски дека бил советник на Никола Груевски за време на настаните на 27 април 2017 година и дека бил во толпата што влезе во парламентот.
„ Вие држите морални предавања за 27 април, за настан во кој и вие бевте учесник во толпата која сакаше да ме убие. Ве видовме на сликите и сега држите морални предавања што е исправно а што не.. Ако ништо друго, вие треба да се срамите од моите лузни“,
му рече Заев на Мицкоски.
Заев, исто така, нагласи дека Законот за амнестија за 27 април бил донесен во процесот на помирување.
Мицкоски претходно рече дека не оправдува насилство, ама дека смета оти казните за 27 април се драконски.
„Има луѓе што сториле многу поголеми кривични дела, ама не одговараат. Го имате човекот кој ја отвори вратата, ама тој не одговара затоа што му е потребен на Заев“,
оцени Мицкоски.
Тој рече дека не бил советник на Груевски затоа што тој не бил премиер на 27 април 2017 година.
Во почетокот на дуелот, Заев побара од Мицкоски да се огради од политиките на Груевски, но не доби прецизен одговор на тоа.
„ВМРО-ДПМНЕ не може да направи разлика меѓу извршна, законодавна и судска власт. Не можете да се одлепите од матрицата на Груевски, цело време зборувате исто како и тој. Вие сте извршител на Груевски, инструмент со кој тој диригира“,
рече Заев, забележувајќи во еден момент „се е исто, само него го нема“.
Наспроти тоа, Мицкоски го нарече Заев „единствен аболициран криминалец“ во оваа држава .
„Иако сакате да им го закачите тој епитет на луѓе од раководството на ВМРО-ДПМНЕ, сепак треба да сте свесни дека единствен аболициран криминалец сте Вие
му рече Мицкоски на Заев.
Во однос на Преспанскиот договор, Мицкоски го обвини Заев дека ги предал идеалите на илјадници луѓе во земјава. Лидерот на СДСМ возврати дека Мицкоски нема став затоа што еднаш гласа за Северна Македонија во НАТО, потоа не гласа… Во тој контекст, Заев му го понуди телефонот на Мицкоски, за, како што рече, да му се јави на Груевски и да го праша за став…