Опозициската партија обвинува дека јавниот повик бил наместен за конкретен организатор и бара одговори каде завршиле народните пари, донациите од спонзорите и средствата од продадените билети
Социјалдемократскиот сојуз на Македонија (СДСМ) упати барање до Владата за итно објавување на сите договори, анекси, фактури, банкарски исплати и даночни пресметки поврзани со организацијата на прославата за независноста и настапот на Дејвид Гета.
На прес-конференција во партиското седиште, Маја Борозан од СДСМ го обвини премиерот Христијан Мицкоски дека ги излажал граѓаните кога најавувал дека прославата ќе чини нула денари, посочувајќи дека за настанот се потрошени дури 5,5 милиони евра, и рече оти според податоците со кои тие располагаат, околу пет милиони евра се обезбедени од нераспределената добивка на Државната лотарија, додека околу 40 милиони денари се прибрани од приватни компании.
„5 милиони евра народни пари кога ќе се потрошат мора граѓаните да знаат секој денар, секое евро каде завршило. Владата мора да ги објави договорите, анексите, фактурите, банкарските исплати, примателите, изведувачите, добавувачите и пресметаните даночни обврски. Сомнежите за дилови се оправдани, поради начинот, одлуката, криењето информации и отворањето на јавниот повик, кој траел само пет работни дена и на кој пристигнала само една понуда“,
вели таа.
Посебно симптоматично за СДСМ е што повикот завршил на 8 мај, а само три дена подоцна власта веќе го најавила настапот на светски познатиот диџеј, што според нив укажува дека условите биле однапред приспособени за конкретниот организатор „Авалон“, фирма за која тврдат дека има блокирана сметка.
„Скриени остануваат и компаниите што обезбедиле околу 40 милиони денари. Не се познати нивните имиња, поединечните износи и основата врз која биле уплатени средствата. Нема јасна евиденција ниту за приближно 1,75 милиони денари од продадените билети – кој ги наплатил, на која сметка завршиле и како биле даночно и сметководствено евидентирани. СДСМ бара веднаш да бидат објавени сите договори, анекси, фактури, банкарски исплати и даночни пресметки, како и целосната листа на приматели, изведувачи, добавувачи и приватни финансиери“,
изјави Борозан.
Борозан нагласи дека доколку Владата веднаш не ги објави овие податоци, ќе мора да се отвори истрага за да се утврди кој профитирал и кој ги злоупотребил народните пари. За илустрација на нетранспарентноста, од СДСМ направија споредба со прославата за членството во НАТО, која се одржала во 15 градови за 240 илјади евра со целосно јавни документи, наспроти актуелниот настан кој чини 5,5 милиони евра и чии детали се држат во тајност од јавноста.