Според него, повикот за „Стража на јазикот“ значи одбрана на мултиетничка Северна Македонија, бидејќи, како што нагласува, ова не е само кауза на Албанците
Централното претседателство на Демократската унија за интеграции (ДУИ) денеска ќе одржи состанок на којшто ќе одлучува за следните чекори, информира за МИА потпретседателот на партијата Бујар Османи, откако интегративците вчера најавија дека почнуваат со иницијатива „Стража на јазикот“ со деноноќно присуство пред Уставниот суд до одржување на седницата за Законот за употреба на јазиците.
„До 11 декември сигурно остануваме, а за понатаму дополнително ќе се решава. Денеска има состанок на Централното претседателство, има и координација на лидерите од ‘Европскиот фронт’ каде што ќе се одлучува за следните чекори“,
вели Османи.
Според него, повикот за „Стража на јазикот“ значи одбрана на мултиетничка Северна Македонија, бидејќи, како што нагласува, ова не е само кауза на Албанците.
„Повикот за одбрана на јазикот е до сите, меѓутоа не само на јазикот, туку ова е повик за стража на мултиетничка, демократска и европска Северна Македонија, така што ова не е само кауза на Албанците, овде очекувам секој човек од добра волја, којшто смета дека требаше досега да ги надминеме прашањата кои што се однесуваат на основните права на етничките заедници и да градиме држава и општество кое што цели кон Европската Унија, но, за жал, ретроградни сили се обидуваат да не вратат назад, предизвикувајќи го најсветото за граѓаните“,
посочува Османи.
Според него, Уставниот суд извршува наредби од владејачката ВМРО-ДПМНЕ, која, како што рече, во партиската програма има забрана за етничка припадност.
„Жал ми е што како земја кандидат за членство во Европската Унија имаме Уставен суд којшто нарачува партиска програма. Знаете дека одлуката да се забрани етничката припадност е пишана во програмата на ВМРО-ДПМНЕ и се реализира со наредба на партијата преку Уставен суд“,
вели потпретседателот на ДУИ.