„Неговото постапување нема никаква врска со мене, со мојата функција, со моето работење или со каква било моја одлука или постапка. Лицето е возач кој во минатото работел и кај други функционери, а на позицијата возач кај генерален секретар е само околу шест месеци“, вели Јанушев чиј возач денеска беше уапсен поради поткуп
Генералниот секретар на Владата, Игор Јанушев, во објава на Фејсбук напиша дека целосно се оградува од постапките на неговиот возач кој денеска беше уапсен поради примање поткуп.
Јанушев вели дека ја поддржува акцијата на надлежните институции за спречување на корупцијата, како и храброста и решителноста на граѓанинот кој го пријавил барањето мито и соработувал со институциите за случајот да биде откриен и процесиран.
„Само со таков однос, пријавување, постапување и неселективна одговорност можеме да изградиме општество во кое корупцијата нема да се премолчува и толерира. За вакви постапки мора да има нулта толеранција, без разлика кој е сторителот“,
вели Јанушев.
Јанушев целосно се огради од постапката на возачот и потенцираше дека тој претходно работел кај други функционери.
„Во однос на мене лично, сакам да бидам кристално јасен дека целосно се оградувам од постапувањето на приведеното лице. Неговото постапување нема никаква врска со мене, со мојата функција, со моето работење или со каква било моја одлука или постапка. Лицето е возач кој во минатото работел и кај други функционери, а на позицијата возач кај генерален секретар е само околу шест месеци. Неговото незаконско постапување е исклучиво негова лична одговорност и за стореното треба да одговара пред надлежните институции. И до сите оние кои мислат дека на ваков начин можат да дојдат до пари или дека ваквото работење може да им се исплати сакам недвосмислено да истакнам дека со оваа Влада, со институциите кои постапуваат и со моето работење како поединец, но и како дел од овој систем, криминалот нема да ви биде исплатлив. Нема да дозволам нечии незаконски постапки да го валкаат угледот на луѓето кои чесно, одговорно и деноноќно работат за резултати, ниту ќе дозволам со такви постапки да се фрла сенка врз работата што ја вложуваме секој ден“,
Тој го искритикува опозицискиот СДСМ велејќи дека нема ситуација во која СДСМ нема да се обиде да измисли, конструира и изврти нешто што нема никаква допирна точка со реалноста.
„Токму затоа е крајно несериозно и политички бедно тоа што СДС повторно се обидува од конкретен случај да произведе политичка конструкција. Кај нив очигледно нема ситуација во која нема да се обидат да измислат ‘врска’, да извртуваат факти и да фрлаат клевети, само за да создадат политичка приказна таму каде што не постои. Но, конструкцијата им е целосно промашена. Нивниот проблем е што не можат да прифатат дека денес институциите постапуваат. Не можат да прифатат дека никој не смее да биде заштитен ако го прекршил законот. И токму затоа денес се обидуваат да ја претстават како проблем акцијата која всушност покажува дека системот функционира. Нема да дозволам нивните политички конструкции да ја сменат вистината“,
вели тој.
Од Министерството за внатрешни работи (МВР) денеска информираа дека бил приведен возач во Службата за општи и заеднички работи (СОЗР) која е дел од Владата.
За возачот имало поднесено пријава од граѓанин и по неа постапувале Одделот за сузбивање на организиран и сериозен криминал – Единицата за корупција при МВР во координација со јавен обвинител. Вработениот со иницијали Д.Ц. бил затекнат при примање на претходно обележани парични средства, по што е лишен од слобода.
Според Основното јавно обвинителство за гонење организиран криминал и корупција (ОЈО-ГОКК), осомничениот му ветил на оштетениот дека ќе посредува кај службени лица во Град Скопје во врска со вработување по распишан оглас за прием на пожарникари.
Од опозицискиот СДСМ излегоа со обвинување дека во владата на премиерот Христијан Мицкоски мито земаат дури и возачите. Според нив, овој, како што го нарекуваат, скандал отвора и прашања за тоа каква била улогата на Јанушев во случајот.