Вицепремиерката за економски прашања Мила Царовска на денешната прес-конференција порача дека Владата на РСМ досега презела десетици мерки за справување со штетите од корона-кризата. На заедничката прес-конференција со министрите за образование, за земјоделство и со заменик-министерот за труд и социјала, Царовска наведе дека воспоставиле протоколи за заштита на работниците, за волонтерски услуги за повозрасните лица, систем за пријавување насилство, помош за непречено движење на лицата со попреченост, вовеле далечинско учење за продолжување на наставата итн. Мерките, како што рече таа, се донесени под мотото „Се грижиме за сите“, а се воделе од принципот на недискриминација и почитување на човековите права.
Царовска додаде дека инспекциските служби направиле повеќе од 33 илјади надзори за имплементација на владините мерки.
„За да ја спречиме злоупотребата на кризата и на мерките, навистина имаме интезивна работа на инспекторатите. Тие спроведоа повеќе од 33 илјади надзори во минатиот период, издадени се 37 решенија за 28 фирми, 140 работници се вратени на работа, кои биле неправедно отпуштени во минатиот период“
изјави вицепремиерката Мила Царовска.
Во соработка со синдикатите, стопанските комори и инспекциските служби, како што рече Царовска, ќе се следи понатамошното спроведување на мерките и ќе бара начин за нивно подобрување.