Вториот круг од локалните избори во Франција ќе се одржи на 28 јуни, повеќе од три месеци по првиот круг организиран среде пандемијата на коронавирусот, изјави денеска премиерот Едуард Филип, објавувавјчи ја одлуката на Владата.
Тој призна дека не е постигнат политички консензус во земјата за овој датум, бидејќи некои политички субјекти барале изборите да се одложат за подоцна.
„Откако ќе ги анализиравме добрите и лошите страни, сметавме дека мора да се врати демократскиот живот во земјата“,
рече Филип на прес-конференција, образложувајќи ја владината одлука, чие спроведување сепак ќе зависи од здравствената ситуација.
Гласањето треба да се спроведе во околу 5 000 општини, каде немаше победници во првиот круг.
Првиот круг на локалните избори се одржа на 15 март, како што беше и планирано, малку пред да биде прогласен карантин во државата, додека вториот круг кој беше закажан за 22 март, беше одложен поради епидемијата со ковид-19.