За секоја фирма што не ги исполнила условите ќе се грижи, рече Мицкоски, посебен тим во Владата, а има и одговорно лице кое тоа ќе го следи, ќе алармира и ќе се обрати до компанијата корисник на средствата, да каже зашто условот не е исполнет
Трансферот на средствата од унгарскиот заем за компаниите ќе почне во јануари, најави денеска премиерот Христијан Мицкоски.
Иако очекувањата, како што рече Мицкоски, биле дека исплатата ќе биде во текот на идната недела, сепак морало да се завршат и испочитуваат одредени законски процедури.
„Очекувам во јануари да почне пренесувањето на средствата, вчера имаше оперативен состанок во Министерството за финансии, се дефинираа чекорите, договор со една и друга страна. Има процедури кои формално треба да бидат запазаени. Јас бев поголем оптимист, мислев дека од почетокот на следната недела ќе почне, но има некои законски процедури кои мораме да ги поминеме. Сега сум конечен во ставот дека во јануари почнува имплементацијата на заемот“,
рече Мицкоски.
Според него, добро е компаниите со помош на кредитот да го зголемат бројот на производи, не да забележат раст само на паричната маса.
„Би сакал не пет, туку и 10 отсто да биде растот. Но, тие десет проценти не да бидат поголеми во парична маса, туку во број на производи. Ако се произведувале 100 сега очекуваме 105 производи“,
додаде Мицкоски.
За секоја фирма што не ги исполнила условите ќе се грижи, рече, посебен тим во Владата, а има и одговорно лице кое тоа ќе го следи, ќе алармира и ќе се обрати до компанијата корисник на средствата, да каже зашто условот не е исполнет.
Компаниите во земјава ќе може да користат 250 милиони евра од унгарскиот кредит, наменет за македонскиот бизнис.
Средствата од кредитната линија за финансирање ќе бидат наменети за финансирање на дејноста производство и ќе можат да се користат за инвестиции во опрема, како машини и останато, недвижности, погони, фабрики, деловни објекти за сопствена употреба, транспортни средства поврзани со производствениот процес, обновливи извори на енергија наменети за производство на енергија и нематеријални средства, како што се инвестиции во развојот и софтвери.
Исплатата ќе биде извршена врз основа на доставени фактури од крајниот корисник со цел да се обезбеди контрола на искористувањето на средствата.