Постапката отвора пат за дистрибуција на стотици милиони дози до загрозените земји кои досега не примиле дози од вакцините против коронавирус
Светската здравствена организација (СЗО) итно ја одобри за користење вакцината против коронавирус на „Астра Зенека“ произведена во азиските земји.
Одобрението се однесува на две верзии на вакцината произведени во Индија и во Јужна Кореја.
Постапката отвора пат за дистрибуција на стотици милиони дози до загрозените земји кои досега не примиле дози од вакцините против коронавирус, изјавија претставниците на СЗО пред новинарите.
Предвидено е со ова одобрување, земјите кои немаат средства самостојно да ја утврдат ефикасноста и безбедноста, да имаат побрз пристап до вакцината.
„Сега ги имаме на располагање сите елементи за брза дистрибуција на вакцините. Но, сепак, треба да го зголемиме производството“,
рече Тедрос Аданом Гебрејесус, генерален директор на СЗО.
Вакцината беше одобрена неколку дена откако работната група на СЗО обезбеди привремени препораки дека на возрасните мора да им се дадат две дози во интервали од околу осум до 12 недели, а може да се користат и во земји со јужноафриканска мутација на вирусот.