Политичарите се подобро дефинирани според она што го прават, наместо по она што го кажуваат, а попладнево Сунак ќе почне да ги назначува кабинетот и владата кои би можеле да управуваат со земјата во следните две години. Ова ќе ни каже доста за неговите вредности и неговите приоритети, пишува „Гардијан“
Новиот премиер на Велика Британија, Риши Сунак, денеска околу пладне треба и официјално да се „всели“ во Даунинг стрит 10 и да го почне својот мандат на функцијата, откако претходно ќе има аудиенција кај кралот, Чарлс Трети на која и формално ќе го добие мандатот за состав на новата британска влада.
Денеска се очекува тој да одржи и говор пред нацијата.
„Риши Сунак е назначен за премиер речиси 18 часа, но сè што слушнавме од него во јавноста е обраќање од 86 секунди во кое звучеше здрвено и клише. Денеска тој ќе одржи соодветен говор пред нацијата, веројатно нешто пред пладне, во Даунинг стрит, откако ќе има аудиенција кај кралот. Понекогаш овие говори може да ја обликуваат премиерската функција (иако не секогаш позитивно – Маргарет Тачер цитирајќи го двети Франциск Асишки, а Тереза Меј зборувајќи за справување со ‘горливите неправди’ поставија одредници во чие остварување не успеаја. Тоа ќе биде клучен момент“,
пишува „Гардијан“ во воведот за денешните протоколарни активности околу преземањето на функцијата премиер, но и очекувањата што Велика Британија ги има, особено по исклучително краткиот мандат на Лиз Трас.
Но, како што потенцира весникот, политичарите се подобро дефинирани според она што го прават наместо по она што го кажуваат, а попладнево Сунак ќе почне да ги назначува кабинетот и владата кои би можеле да управуваат со земјата во следните две години.
„Ова ќе ни каже многу за неговите вредности и приоритети“,
наведува „Гардијан“.
Ако Британија од Сунак досега не слушна многу, поранешната министерка Викторија Аткинс, една од неговите поддржувачи, утрово за Скај њуз, зборувајќи за неговиот учинок како министер за финансии за време на пандемијата, изјави дека мандатот на новиот премиер ќе биде „охрабрувачки“.
„Ќе видиме повеќе од Риши во ова ново светло… ќе биде охрабрувачки. Не ве молам да замислите дека тој е добар во ова, знаеме дека е добар. Затоа што го видовме тоа додека сите бевме згрчени околу нашите телевизори за време на заклучувањето и бевме уверени од Риши велејќи: `ова е она што ќе го направам за вас, ќе се прегрнеме`. Јас сум многу, многу уверенa дека ќе видиме повеќе од Риши во ова светло, ќе нè смири стабилизирајќи ги пазарите“,
вели Аткинс.
Попладнево Риши Сунак треба да почне да го составува владиниот кабинет, но засега, како што пренесува Би-би-си, нема потврда кој ќе биде во него.
Се очекува Џереми Хант да остане во Министерството за здравство за да се обезбеди одредена стабилност, а како што наведува британскиот национален сервис, тој ќе сака да донесе и некој од неговите сојузници кои го поддржуваа во текот на летот, односно луѓе како Доминик Раб
Тој, исто, така ќе сака да ја обедини својата партија, што најверојатно ќе вклучи личности од различни крила на Конзервативната партија.
Тоа ќе биде различен пристап од Лиз Трас и Борис Џонсон кои ги спакуваа своите кабинети со лојалисти, пишува Би-би-си заклучувајќи дека „назначувањето на кабинет е секогаш комплицирано, а за Риши Сунак тоа ќе биде уште повеќе“.
Риши Сунак ќе биде 57. премиер на Велика Британија. Првиот што има азиски корени, еден од најбогатите премиери досега, но и најмладиот што го имала оваа земја уште од 1812 година.