На ексгенералниот секретар на Владата ќе му суди за повеќекратно извршување на кривичното дело злоупотреба на службената положба. Обвинението опфаќа два договорa што тој ги склучил додека бил на функцијата
Судскиот процес во кој обвинет е поранешниот генерален секретар на Владата Мухамед Зеќири ќе почне на 15 декември годинава.
Предметот се падна кај судечки совет на чело со судијката Фанка Јанчулева-Михаиловска, која е претседателка на советот и во случајот „Софтвери“ каде што првообвинет е претходникот на Зеќири во Генералниот секретаријат, Драги Рашковски.
Закажувањето на првото рочиште за случајот со Зеќири следува откако на 4 октомври годинава Обвинителството за гонење организиран криминал и корупција поднесе обвинение, а пред три дена (1 ноември) Основниот кривичен суд Скопје го прифати.
На ексгенералниот секретар на Владата ќе му суди за повеќекратно извршување на кривичното дело злоупотреба на службената положба.
Обвинението опфаќа два договори што тој ги склучил додека бил на функцијата, а за кои во обвинителството тврди дека се направени спротивно на Законот за јавни набавки и дека со нив е оштетен државниот буџет за вкупно 89 385 255 денари (околу 1 453 418 евра).
Првиот договор е за консултантски услуги во врска со АД „Пошта на Северна Македонија“, а за кој дел се осомничени и двајца хрватски државјани кои се недостапни за македонското обвинителство.
Договорот бил потпишан на 4 мај 2021 година, склучил договор за консултантски услуги вреден 795 000 евра. Фирмата со која бил склучен овој договор била формирана само дваесет дена пред неговото потпишување, а еден од Хрватите осомничен во постапката е соосновач и управител. Оваа фирма понатаму склучила уште еден договор со вториот осомничен Хрват.
„По склучениот договор, правното лице склучило договор за консултантски услуги за постапка на процена на вредноста, како и длабинско снимање на АД ‘Пошта на Северна Македонија’ Скопје со вториот осомничен хрватски државјанин, за износ од 130 000 евра во денарска противвредност. Во критичниот период, во повеќе наврати од сметката на Владата на РСМ се исплаќани парични средства на сметката на правното лице, со што за правното лице е прибавена значителна противправна имотна корист во вкупен износ од 57.932.100,00 денари (околу 942 000 евра), што го претставува износот согласно договорот зголемен за 18 отсто ДДВ, а за кој износ е оштетен Буџетот на РСМ“,
рекоа од Обвинителството при поднесување на обвинението.
Вториот договор за кој се гони Зеќири, пак, е за консултантски услуги за потенцијална приватизација на „Железници“. Тој бил склучен еден месец со друга фирма на 23 јули 2021 и бил во вредност од 772 400 евра без ДДВ.
„На сметка на ова правно лице Владата на РСМ врз основа на издадена фактура првично исплатила аванс од 11 284 162 денари (околу 183 000 евра) за одржување на почетен состанок со правното лице, односно за официјално започнување на проектот, а потоа врз основа на уште четири фактури биле исплатени буџетски средства во износ од 26 247 138 денари (околу 378 000 евра), за кој износ е оштетен Буџетот на РСМ“,
тврди Обвинителството.
ОЈО ГОКК наведува дека пред да се склучат овие договори не се испочитувал Законот за јавни набавки односно не била спроведена соодветна јавна набавка за да може на конкурентен начин да се избере фирма.