Симптоматично е што на фирмите членки на Конзорциумот им фалат клучни документи во договорот за надзор за 23 експерти, за кои нема доказ дека работат или се ангажирани од една од фирмите, велат од ВМРО-ДПМНЕ
Како што објави „360 степени“ во понеделникот, анализата на достапната документација покажува дека во договорот за надзор над „Бехтел и Енка“ нема доказ за 23 од вкупно 81 експерт – која фирма од добитничките ги ангажирала
Продолжуваат да испливуваат на површина голем број нерегуларности и недоследности со надзорот на изградбата на коридорите 8 и 10-д, реагираат денеска од опозициската ВМРО-ДПМНЕ. Оттаму нагласуваат дека „Ковачевски и Груби успеаја да компромитираат огромен проект за изградба на патни коридори“.
„Според најновите информации кои ги објавија медиумите, ‘Електра солушнс’ преку која ќе поминат најмногу пари од договорот за надзор, 8,3 милиони евра, има само четири свои вработени ангажирани на проектот и тие четири лица ги вработила на 20.10.2022 година, т. е. откако ја добиле лиценцата за надзор. Се поставува прашањето како тогаш ‘Електра солушнс’ ги исполнила условите за издавање на лиценца за надзор, и дали само времено вработила лица за да добие лиценца, а потоа истите тие лица не ги ангажира на проектот“,
праша пратеникот Бојан Стојаноски од ВМРО-ДПМНЕ.
Дополнително, додаде тој, симптоматично е што на фирмите членки на Конзорциумот им фалат клучни документи во договорот за надзор за 23 експерти, за кои нема доказ дека работат или се ангажирани од една од фирмите.
„За сите овие лица ‘Електра солушнс’, ‘Евро консалтинг’, ‘ИРД’ и ‘ЕПТИСА’ ќе наплатат огромни суми на пари, кои се неколкукратно повеќе од сумите кои се наплаќани за надзор на други проекти. Имено, според податоците кои се објавени, може да се забележи дека главен надзорен инженер за автопатот Скопје – Блаце е буџетиран на 2 900 евра месечно, а за надзорот на коридорите 8 и 10-д за истата позиција се предвидени седум пати повеќе, односно 20 000 евра месечно. Услугата за еден геометар на надзорот на автопатот Скопје – Блаце чини 1 300 евра месечно, а за надзорот над коридорите 8 и 10-д е 5 600 евра месечно. Надзорен инженер за животна средина за надзор на автопатот Кичево – Охрид е тарифиран 5 450 евра месечно, додека за коридорите 8 и 10-д 9 000 евра“,
рече Стојаноски.
Од ВМРО-ДПМНЕ нагласуваат дека парите кои се предвидени за одреден кадар не се слеваат кај работниците, туку кај фирмите, а тие исплаќаат дел од сумата на име плата или договор за дело, a остатокот останува за надзорот.
„Оттука се поставува логичното прашање, како надзор на автопати на други проекти е поевтин од 2 до 7 пати од надзорот на коридорите 8 и 10-д? Имајќи ја во вид оваа пресметка, јасно е зошто ‘Електра солушнс’ вадела лиценца за надзор во сред јавен повик, пријавувала и одјавувала работници, и правела секакви шеми. ЈО не смее да чека ниту ден повеќе и веднаш да отвори постапка за надзорот. Доволно е да си постават логично прашање, како е можна толкава дискрепанца во цените? Одговорот на истото ќе им ја даде насоката“,
изјави Стојаноски.
Како што објави „360 степени“ во понеделникот, анализата на достапната документација покажува дека во договорот за надзор над „Бехтел и Енка“ нема доказ за 23 од вкупно 81 експерт – која фирма од добитничките ги ангажирала. На нивните биографии стои дека се вработени во фирми кои немаат никаква правна поврзаност со тендерот за надзор над работата на автопатите од коридорите 8 и 10-д.
Од Јавното претпријатие за државни патишта тврдат дека тие лица се вработени во фирмата „Електра солушнс“ (иако на нивните биографии пишува поинаку) и дека имаат доказ во форма на М1/М2 образец. Но, претпријатието не сака да ги сподели доказите поради заштита на личните податоците. На останатите 58 експерти, патем, им се јавно објавени дури и матичните броеви.
Настрана од тврдењето на ЈПДП дека има докази што не може да ги објави, според јавно достапните документи поврзани со вработувањето на експертите, фирмата преку која ќе поминат најмногу пари и работа, „Електра солушнс“, всушност, има најмалку свои вработени меѓу ангажираните во надзорот – само четворица. И не само тоа, туку и дека тие четворица ги вработила на 20 октомври 2022 година
Ако „Електра солушнс“ учествува во надзорот со само четворица вработени инженери, кои ги пријавила на 20 октомври, тогаш со кои инженери на 27 септември го поднела барањето за добивање лиценца А за надзор?
Според Законот за градење, за да се добие лиценца А за надзор, мора да се има најмалку четворица вработени инженери, од кои двајца со овластување А за надзор.
„360 степени“ разговараше и со директорот на Јавното претпријатие за државни патишта Ејуп Рустеми, за повеќе аспекти во врска со надзорот над „Бехтел и Енка“. Интервјуто беше снимено пред откривањето на недостатокот од документи за ангажманот на дел од експертите во договорот.