Министерот Венко Филипче рече дека овие што сега ги имаме се доволни за вакцинација на здравствените работници кои се во првата група и најави дека динамиката од 250 до 300 вакцинирани дневно во модуларната болница во Скопје ќе продолжи
Министрите за здравство Венко Филипче и Златибор Лончар на граничниот премин извршија примопредавање на втората пратка од договорените над 8 000 вакцини што Србија ги одвои за нас од своите количини.
Со денешната пратка, која содржи 3 510 дози и претходната со 4 680 дози, вкупно се работи за 8 190 дози од вакцината „Фајзер“.
Со претходните 4 680, кои стигнаа пред 10 дена, започна вакцинацијата во земјава и тоа во првата фаза со која се опфатени здравствените работници кои од почетокот на пандемијата работат со ковид-пациенти.
Министерот Венко Филипче рече дека овие што сега ги имаме се доволни за оваа група приоритетни граѓани и најави дека динамиката од 250 до 300 вакцинирани дневно во модуларната болница во Скопје ќе продолжи.
Одговарајќи на новинарско прашање за другите вакцини што се најавуваат, Филипче рече дека се во секојдневна комуникација со „Фајзер“ од каде што се очекува набавка по директен договор, но не можеше да каже точен датум.
За кинеските вакцини, исто така, не можеше да каже прецизно кога ќе пристигнат, освен дека денеска ќе биде направена уште една размена на писма преку МНР и за кратко време ќе го има и датумот на пристигнување.
Следните две други количини што се очекуваат се „Астра Зенека“ и руската „спутник В“.
„Преку Ковакс очекуваме 20-30 000 вакцини на ‘Астра Зенека’, според договорот на почетокот на март. Денеска на затворена владина седница ќе се разговара за набавката на 100 000 дози од руската вакцина“,
рече Филипче.