Габриел Ескобар денеска во Скопје ќе се сретне со претседателот Стево Пендаровски, а во текот на дводневната посета предвидено е да има средби и со премиерот Димитар Ковачевски, како и со лидерот на ВМРО-ДПМНЕ Христијан Мицкоски
Заменик-помошникот државен секретар на САД, Габриел Ескобар, се надева на продуктивни дискусии со владините лидери за време на неговата посета на Северна Македонија, изјавија од прес-службата на Стејт департментот за Гласот на Америка на македонски, на барањето коментар за реакцијата на опозицијата пред посетата на Ескобар на Скопје.
„Ескобар патува во Северна Македонија за да разговара за билатерални и регионални прашања и да продолжи да го зајакнува нашето партнерство со ценет НАТО сојузник. Тој се надева на продуктивни и заеднички дискусии со владините лидери за време на неговата посета, особено поврзани со идната интеграција во ЕУ и долгорочниот просперитет на Западен Балкан“,
велат од Стејт департментот.
Лидерот на ВМРО-ДПМНЕ, Христијан Мицкоски, вчера изјави дека „тоа што сега власта се обидува посетата на Ескобар да ја претстави, условно кажано, како дипломатски булдожер којшто тука е повикан од Владата за да врши тортура и притисок, е веќе слабост на овие криминалци во Владата. Тортура и притисок во 21. век веќе никој не врши, а и да вршат, тогаш одбрале погрешни соговорници“.
Мицкоски, исто така, рече дека посетата на Ескобар ја цени како и секоја друга посета.
„Посетата на господинот Грабриел Ескобар ја ценам како и секоја друга посета. Изминатиот период имавме многу посети од високи странски претставници. Ќе ги слушнеме аргументите од таа страна, ќе ги кажеме нашите аргументи и отприлика содржината на тој состанок се наѕира, ја знаеме која е. Така што секој добронамерен соговорник е добредојден, секој оној што сака да ги слушне аргументите на коалицијата предводена од ВМРО-ДПМНЕ, на народот во Македонија е добредојден“,
кажа Мицкоски.
Габриел Ескобар денеска во Скопје ќе се сретне со претседателот Стево Пендаровски, а во текот на дводневната посета предвидено е да има средби и со премиерот Димитар Ковачевски, како и со лидерот на ВМРО-ДПМНЕ Христијан Мицкоски.
Доаѓањето на Ескобар во Скопје следува по започнувањето на собраниската седница за усвојување на уставните измени за внесување на Бугарите во Уставот како услов земјава да ги продолжи преговорите со Европската Унија. Гласањето за Предлогот за пристапување кон измена на Уставо беше одложено до обезбедување на потребното двотретинско мнозинство.