За сиот имот што е опфатен со обвинението се бара конфискација, а, според сумите за кои биле купени или колку се проценети парцелите и становите, нивната вкупна вредност е околу 1 530 000 евра
Купувањето и прекривањето на вистинскиот сопственик на трите атрактивни парцели на Водно преку фирма од Белизе, како и уште еден плац во центарот на Скопје, два стана во главниот град и две парцели во Крушево, се предмет на обвинението што го поднесе денеска Основното јавно обвинителство за гонење организиран криминал и корупција до Основниот кривичен суд во Скопје за случајот познат како „Плацови на Водно“.
Обвинителството истовремено бара и конфискација на овој имот.
Обвинението опфаќа шест лица. Експремиерот Никола Груевски, кој се посочува како краен сопственик, е обвинет за делата перење пари и за противправно стекнување и прикривање на имот. Неговиот кум, Ристо Новачевски, бизнисмените Ненад Јосифовиќ, Јордан (Орце) Камчев и неговата мајка, Ратка Куновска-Камчева, се товарат за перење пари, а првиот братучед на Груевски и поранешен директор на УБК, Сашо Мијалков, пак, е обвинет за помагање во делото перење пари.
Обвинението, како што информираа од Основниот кривичен суд, според АКМИС ќе биде распоредено кај совет кој ќе треба да го оцени, односно да одлучи дали ќе го прифати. Ако биде прифатено, потоа ќе се распоредени кај судечки совет и ќе се закаже почеток на судскиот процес.
Каква е шемата на поврзаност на обвинетите
За купувањето на имотот биле користени пари од донации во ВМРО-ДПМНЕ, а во шемата на купување е вклучена офшор-фирма од Белизе.
Според соопштението што го објави Обвинителството, во периодот од јуни 2006 до октомври 2012 година, Груевски како лидер на партијата наместо да ги прикаже како примени донации во ВМРО-ДПМНЕ, 1,3 милион евра (79 972 140 денари) ги прибавил за себе, а потоа ги пуштал во оптек и преку Белизе и ги купувал парцелите. Станува збор за земјиште на кое имало шума, а кое со промените во Генералниот урбанистички план (ГУП) било пренаменето во градежно.
Обвинителството тврди дека откако кон средината на 2012 година Груевски дознал дека иселени граѓани продаваат земјиште од 11 000 квадратни метри на Водно и побарал од неговиот братучед Мијалков да му помогне да го купи, ама и да скрие дека тој е вистинскиот сопственик. Тука, тогашниот директор на УБК го вклучува Ненад Јосифовиќ.
„Обвинетиот С.М. стапил во контакт со обвинетиот Н.Ј., кој бил сопственик на веќе регистрирана офшор-фирма во Белизе и се договорил оваа фирма да биде основач на домашно правно лице кое ќе биде употребено за купување на земјиштето. Иако знаел дека неговото правно лице ќе се користи за прикривање на вистинскиот сопственик на купувачот на земјиштето, обвинетиот Н.Ј. во договор со обвинетиот С.М. основал правно лице во Скопје“,
велат од Обвинителството.
За управител на скопската фирма го назначиле Ристо Новачевски. Кога ја договориле зделката, Груевски во повеќе наврати преку сметката на офшор-фирмата во Белизе ги префрлил парите на сметка на фирмата во Скопје, а Новачевски со нив потоа го купил земјиштето за 1 299 215 евра.
Во 2015 година во мрежата, според Обвинителството, се вклучуваат Камчеви кои со нивна фирма го преземаат уделот што го имала офшор-компанијата од Белизе во скопската фирма.
„Обвинетиот Ј.К. како управител на правно лице и обвинетата Р.К.К. како краен сопственик на истото правно лице, иако знаеле дека имотот е прибавен со кривично дело, истиот го примиле во сопственост на нивното правно лице и донеле одлука преземеното правно лице да се преименува и сопственоста да се пренесе на правните лица каде што обвинетиот Ј.К. е управител, а обвинетата Р.К.К. сопственик“,
вели Обвинителството.
На атрактивната парцела од 11 000 квадрати метри претходно била направена физичка делба и истата била поделена на три плаца, од кои едниот обвинетите го продале, а уделите во преостанатите два плаца и во фирмата Камчеви ги пренеле на трето лице.
„Уделите во преименуваното правно лице и останатите две парцели фиктивно биле пренесени на трето лице без да биде платен уделот и со договор во кој бил определен рок за исплата на купопродажбата цена со клаузула дека ако рокот не биде испочитуван, договорите се ништовни со што ја прикриле локацијата на имотот и неговата сопственост“,
објаснува Обвинителството.
Покрај овие три плаца, со обвинението се опфатени уште една градежна парцела од 2 729 квадрати метри во центарот на Скопје, два стана од 38 и 57 квадратни метри во Скопје, како и две градежни парцели во Крушево вредни речиси 800 000 денаеи. За нив, Обвинителството тврди дека само фиктивно како сопственик се води Ристо Новачевски, додека вистинскиот сопственик е Груевски, кој по престанокот на премиерската функција не ги пријавил во Анкетниот лист до Државната комисија за спречување корупција и судир на интереси.
Имотот за кој се бара конфискација тежи 1,5 милион евра
За сиот имот што е опфатен со обвинението се бара конфискација, а според сумите за кои биле купени или за колку се проценети, а се наведени во соопштението, вкупната вредност е околу 1 530 000 евра или поединечно:
- 1 299 215 евра – сумата за која било купено земјиштето на Водно;
- 60 000 евра – вредноста на станот од 57 квадрати метри во Скопје;
- 41 000 евра – вредноста на станот од 38 квадратни метри во Скопје;
- 120 000 евра (7 365 600 денари) – дополнителната парцела во Скопје;
- 13 000 евра (795 424 денари ) – земјиштето во Крушево.
Во соопштението од Обвинителството не се наведува адресата на двата стана во главниот град, но од претходно е познато дека надлежните органи вршеа претрес во зградата на Бихаќска, каде што живееше експремиерот. Тогашните информации што излегоа во јавноста беа дека во зградата покрај во двата стана во кои тој живееше со семејството, откриени се и овие два дополнителни.
Груевски, пак, тогаш се бранеше дека не се негови, туку станува збор за станови за кои плаќал кирија и имал договор за закуп. Исто така, негираше и дека криел земјиште.
Пред неколку дена се огласи и одбраната на Камчев, која тврдеше дека бизнисменот нема никаква вина во овој предмет и обвинението е само изговор за тој да остане во притвор.
Нов притвор за Камчев, Јосифовиќ да се јавува еднаш неделно во судот
Со обвинението до Основниот кривичен суд е поднесен и предлог за продолжување на мерката притвор за бизнисменот Орце Камчев, која му беше одредена на 14 март, а пред еден месец му беше и продолжена поради опасноста од бегство. Од Основниот кривичен суд Скопје се огласија и соопштија дека го продолжиле притворот за нови 30 дена. Прифатени се и предложените мерки за другите обвинети, па така на Ратка Куновска-Камчева, пак, ѝ се одземени македонскиот и бугарскиот пасош и има обврска еднаш неделно да се јавува во судот. И Ненад Јосифовиќ ќе треба еднаш неделно да се пријавува во судот.
Притвор е одреден и за Груевски, кој би стапил во сила ако некогаш биде достапен за македонските органи.
Сашо Мијалков, пак, веќе се наоѓа во притвор за предметот „Трезор“, каде што неодамна беше осуден на неправосилна казна затвор од 8 години.