Успешно заврши трансплантацијата на срце кај пациент кој неколку години боледувал од кардиоваскуларна болест. Операцијата траеше во текот на ноќта, а дарител е 44-годишната пациентка кај која вчера беше констатирана мозочна смрт. Следните денови се критични и се очекува пациентот да го прифати новиот орган, соопшти министерот за здравство Венко Филипче.
„Рано утрово срцето на 44-годишната пациентка, чие семејство несебично ги донираше органите, почна повторно да чука. Следните денови се критични, да се надеваме дека телото ќе го прифати новиот орган. Пациент кој неколку години боледува од тешка кардиоваскуларна болест добива шанса за нов живот. Во изминативе 24 часа околу 100-ина лекари, медицински сестри и болничари работеа заедно како тим и покажаа како беспрекорно функционира здравствениот систем“,
напиша Филипче на Фејсбук.
Медицинските тимови од Клиниката за урологија и Клиниката за кардиохирургија уште пред полноќ почнаа експлантација на бубрези и срце од 44-годишната дарителка.
Вчера Филипче соопшти дека тројца пациенти се подготвуваа за трансплантација на органиите – срцето и бубрезите од дарителот. Постапката за трансплантација на срцето и бубрезите почна по полноќ, а потоа и експлантација на коскени ткива.
Постапката за транспплантациите ја водат болничките координатори од КАРИЛ заедно со Министерството за здравство. Ова е трета трансплантација од јануари и петта во изминатава година. Повеќе детали за операцијата се најавени за во текот на денот.