За време на руската агресија во Украина не може да има тензија во Европа и дека мора да се надмине кризата и да се намалат тензиите меѓу Белград и Приштина, вели портпаролката на ЕУ за надворешни работи, Набила Масрали
Портпаролката на ЕУ за надворешни работи, Набила Масрали, објасни дека Белград и Приштина доставиле одговори на француско-германскиот предлог за нормализација на односите.
Масрали, во врска со изјавата на високиот претставник за надворешна политика на ЕУ, Жосеп Борел, дека ја очекува реакцијата на Белград и Приштина во однос на предлогот на Германија и Франција за нормализација, изјави дека во наредните денови ќе се разговара со двете страни.
Масрали рече и „германско-францускиот предлог им бил претставен на Белград и Приштина со цел да се постигне конкретен и неповратен напредок на патот кон широка реализација на нормализацијата на односите“.
Таа нагласи дека за време на руската агресија во Украина не може да има тензија во Европа и дека мора да се надмине кризата и да се намалат тензиите меѓу Белград и Приштина.
„Во овој контекст, високиот претставник за надворешна политика побара од двете страни да постигнат брз напредок по предлогот и му даде мандат на специјалниот претставник Мирослав Лајчак да ги продолжи разговорите со страните. Ги повикуваме двете страни да ги искористат предностите на оваа можност и да направат историски чекор во нормализацијата на односите, што е од клучно значење за тие да напредуваат кон ЕУ“,
рече Масрали.
Комисијата, вели Масрали, „не може да ја коментира содржината на тој документ и не може да каже повеќе од она што претседателот на Комисијата и високиот претставник на ЕУ веќе го кажаа јавно“.
Претседателката на Европската комисија Урсула фон дер Лајен вчера во Берлин изјави дека ЕК го поддржува германско-францускиот предлог за решение на косовското прашање и ќе го интегрира во дијалогот.
Специјалниот претставник на Европската унија за дијалог меѓу Белград и Приштина, Мирослав Лајчак вечерва престојува во Белград, каде ќе се сретне со претседателот Александар Вучиќ.