Од „Илинденска“ појаснуваат дека административните постапки за стекнување сертификати се идентични за сите држави членки на Алијансата и може да траат и повеќе месеци
Постапката за стекнување НАТО безбедносен сертификат за министерот за внатрешни работи Оливер Спасовски е во тек, а за министерот за правда Бојан Маричиќ ваков документ воопшто не е ни потребен, изјавиле од Владата за МИА откако ВМРО-ДПМНЕ обвини дека двајцата министри немаат сертификати од Алијансата.
Од Владата додаваат дека претседателот на државата, премиерот и претседателот на Собранието поседуваат национални безбедносни сертификати.
„Северна Македонија ги остварува сите права и ги реализира сите обврски како полноправна членка на НАТО на идентичен начин со сите други 29 земји сојузници. Административните постапки за стекнување безбедносни сертификати се идентични за сите држави членки и може да траат и до шест месеци, а пандемијата дополнително го пролонгира тој процес. За министерот за внатрешни работи, постапката е во тек, а за министерот за правда, ваков документ воопшто не е потребен. Независно од тоа, претседателот на државата, претседателот на Владата, претседателот на Собранието поседуваат национални безбедносни сертификати“,
се нагласува во изјавата од Владата за МИА.
Претходно, пратеникот од ВМРО-ДПМНЕ Бране Петрушевски, на прес-конференција, праша дали Бојан Маричиќ е вториот министер во владата на Заев кој нема НАТО-сертификат.
„Дали првиот човек на правда е недоверлив според стандардите на НАТО? Покрај Оливер Спасовски, кој сам призна дека нема НАТО-сертификат, Маричиќ би бил вториот министер во владата на Заев без сертификат, а и тој, како и Спасовски, води ресор од исклучителна важност за безбедноста на државата“,
посочи Петрушевски.