Претседателот Стево Пендаровски вели дека не очекува бројката на одбиени да надмине 15 лица
Се проверуваат нивните врски со шпионски канали и висока корупција
Повеќе од половина од лицата кои се подложени на реветинг процесот, кој се спроведува согласно НАТО – стандардите досега го поминале тестот. Процесот се уште трае, се проверуваат околу 150 лица од највисоките политички, разузнавачки и одбранбени ешалони и досега само за двајца има негативни оценки, меѓу нив е и нашиот кандидат за воен претставник во НАТО, вели претседателот на државата Стево Пендаровски.
„Слушам различни шпекулации и најголемиот број од нив не се точни. Делумно затоа што тоа е многу сензитивен процес и вистинските бројки, прецизни, а не па имиња и презимиња веројатно никогаш нема да излезат во јавност бидејќи не треба. Меѓутоа, станува збор за проверките што досега се прават за околу 150 лица од највисоките политички, разузнавачки и одбранбени ешалони и досега проверката е завршена за повеќе од половина од таа бројка – позитивно. Значи, повеќе од половина“,
вели Пендаровски во интервју за МИА.
Досега се одбиени две барања, очекува дека ќе бидат одбиени и други, но, како што нагласи смета дека таа бројка нема да надмине 15 лица.
„Едниот е веќе познат во јавноста, а нашиот кандидат што требаше да биде главен воен претставник во Алијансата во седиштето во НАТО и второто лице сè уште не е познато во јавноста, меѓутоа не би сакал да шпекулирам, не е од сферата на политиката за кој интересот во јавноста е најголем. Меѓутоа, имаме досега многу мал број одбиени луѓе. Само двајца формално до овој момент. Можеби ќе има уште неколку, меѓутоа јас не очекувам дека тие ќе бидат повеќе од дузина, 10-15 максимум“,
смета Пендаровски.
„360 степени“ неодамна објави дека полковникот Зоран Секуловски и по една година од номинацијата за воен претставник на земјава во НАТО не е заминат за Брисел.
Проверките не познаваат партија – битни се евенутуални “шпионски врски“ и корупција
Сите функционери, но и сите вработени чии работни обврски подразбираат работа со НАТО- класифицирани информации треба да поседуваат НАТО безбедносен сертификат. Како земја- партнер Северна Македонија и порано разменуваше класифицирани информации со НАТО и одреден број функционери и вработени и порано имаа пристап до НАТО сетификати, но само до определен степен на тајност. До пред официјалниот влез сите функционери кои имаа контакт со класифицирани информации беше потребен т.н. национален сертификат за пристап до нив, но, од март лани е неопходен НАТО сертификат за пристап до класифицирани информации.
Има четири степени на тајност на информациите, а највисокиот „топ сикрет“ се очекува да го има само државниот врз – претседателот, премиерот, министерката за одбрана, началникот на Генералштабот.
Самиот Пендаровски формално бил првиот кој бил ставен на проверка и пред неколку месеци добил НАТО – сертификат за допир со класифицирани информации.
Оваа проверка се врши од 27 март, откако Северна Македонија и официјално стана земја-членка и се спроведува по две основи.
„Проверуваат по две основи. Едната е дали имате контакти со тие ги нарекуваат малигни државни, ентитети и поединци, преведено во наш јазик дали имате некакви сознанија за тоа и тоа лице дека евентуално е блиску до некои шпионски канали или комуникации, а втората е висока корупција. И кога ги прашував луѓето од НАТО зошто висока корупција, тоа би требало да биде надвор од оваа организација, која се бави со безбедност и со разузнавање, исто така вели ако е некој склон, тоа не се докази повторувам, дека некој е корумпиран или не е доказ дека некој е шпион на друга држава, меѓутоа ако некој е склон, вели, тој збор го употребуваат, ако некој инклинира кон висока корупција може да биде лесна цел и за шпионажа. Значи, тоа се тие две главни основи, по кои тие ги проверуваат. Нè проверуваат сите нас“,
нагласува шефот на државата.
Претседателот вели дека оваа проверка не познава партија, во неа не важи – ако некој е од спротивниот политички табор е криминалец, ако е од твоите се снашол.
Реветингот го водат домашните органи, кај нас формално тоа го спроведува Дирекција за безбедност на класифицирани информации, а вклучени се сите други агенции, разузнавачки, контраразузнавачки, кои даваат свое мислење. Во процесот се вклучени тројца или четворица неформални советници на НАТО, кои го мониторираат реветингот, слично на набљудувачите на ОБСЕ, кои ги следат судските процеси.
„На крајот наш судија во наша постапка домашна ја носи пресудата, меѓутоа ОБСЕ дава извештај и вели беше во согласност со законите, беше во согласност нели со меѓународни стандарди или не беше. Таква е слична улогата консултативна на луѓето од НАТО, кои велат ова е навистина направено по сите нишани или според сите ваши интерни прописи или не е направено. Затоа е поголема одговорноста и свеста додека го правите тој процес“,
посочува шефот на државата.