Министерката за одбрана нагласи дека офицерите кои сега не добија „виза“ од Алијансата добиле безбедносни сертификати од владата на ВМРО-ДПМНЕ
ВМРО-ДПМНЕ очекува оставка од мене, претпоставуваш уште пред да бидам избрана за министерка чекале оставка. За што да дадам оставка, дека влеговме во НАТО?
Со ваков коментар одговори министерката за одбрана, Радмила Шекеринска, на дебата во Собранието, каде што пратеникот Љупчо Пренџов од ГРОМ во прашање побара одговорност за недобивањето на сертификати од НАТО за претставници од нашата армија.
„Кого и за кого шпионирале овие генерали кои не може да добијат сертификат од НАТО? Омилена реплика на Шекеринска ѝ беше дека одговорноста има име и презиме, па дали ќе си поднесе оствака и како држава барем малку ќе го покриеме меѓународниот срам кој ни се случува во НАТ?“,
рече Пренџов.
Шекеринска во одговорот возврати и дека кога некој од ВМРО-ДПМНЕ зборува за НАТО треба барем малку да му се вцрвени образот зашто, според неа, оваа партија изминативе три години ставала сопки на секој наш получекор кон Алијансата.
„Да, НАТО кажал ’не‘ на сертификати која вашата влада ги дала и вие денеска зборувате овде на оваа тема? Вие имате право и немате срам да барате одговорнст за тоа … Ги фрлате низ вода сите ваши, ќе ги искористите и ќе ги пуштите. Кога плукате, плукате и по луѓе кои помогнале да станеме членка на НАТО, но и по луѓе кои вие сте ги поставиле, вие сте ги унапредиле. Има само двајца генерали кои се избрани како резултат на мој предлог. Тие двајца имаат НАТО сертификати. И сега кој ќе излезе овде да се извинува?“,
рече Шекеринска.
Таа ја праша опозицијата и дали треба да даде оставка поради влезот во НАТО затоа што меѓу ВМРО-ДПМНЕ има и такви кои не се за НАТО и имаат дилеми околу стратешките приоритети на земјата, а ја искористи можноста да зборува и за постигнувањата што ги направила.
„Јас сум за НАТО. Голем дел од вас беа против. За тоа ми барате оставка или ми барате оставка дека првпат кога ќе кажат луѓето дека работат во Армија, не треба да почнат да се жалат од плати, од услови и од заборавеност од државата. Да, од мене барате оставка заради тоа што првпат војската трипати по ред има повисоки плати. Од мене барате оставка затоа што првпат кога ќе видите војник нема да коментирате дека му е стара униформата и искинати чизмите. Барате оставка најверојатно од мене затоа што и сите имаат станбено обезбедување“,
рече Шекеринска.
Додека таа одговараше, коментарите и дофрлањата од место на опозициските пратеници речиси и да не стивнаа. А, процедурално се побуни и координаторот на ВМРО-ДПМНЕ, Никола Мицевски. Тој реагираше дека Шекеринска не одговорила на конкретното прашање на Пренџов, како и дека таа неосновано ги обвинува зошто сите закони во Собранието од областа на одбраната биле донесени со двотретинско мнозинство односно и со поддршка на пратениците од ВМРО-ДПМНЕ.