На почетокот на месецов и Судскиот совет со иницијатива до Уставниот суд ги оспори одредбите од измените на два од шесте закони изгласани во Собранието со кои се стопира растот на платите на избраните и именуваните функционери – категорија во која, меѓу другите, спаѓаат и судиите, членовите на Судскиот совет, обвинителите и членовите на Советот на јавни обвинители
По Судскиот совет, и Советот на јавни обвинители најави дека пред Уставниот суд ќе го оспори неодамна донесеното законско решение со кое се стопира растот на платите на избраните и именуваните функционери, меѓу кои и јавните обвинители и судиите. Според Советот на јавни обвинители, намалувањето на коефициентите на платите е неуставно и политички мотивирано, а оти платите на обвинителите се заштитени со закон.
Финансиската независност на правосудните органи, меѓу кои и на јавното обвинителство, како што изјави претседателката на Советот на јавни обвинители, Душица Димитриеска, е клучна во процесот на унапредување на независноста и самостојноста на јавните обвинители. Додава дека за да се зачува положбата и статусот на јавните обвинители, нивната плата мора да биде надвор од секакви влијанија.
На почетокот на месецов и Судскиот совет со иницијатива до Уставниот суд ги оспори одредбите од измените на два од шесте закони изгласани во Собранието со кои се стопира растот на платите на избраните и именуваните функционери, категорија во која спаѓаат и судиите и членовите на Судскиот совет.
Со пакетот закони кои беа изгласани на крајот на февруари, а со кои се намалуваат коефициентите на платите на избраните и именуваните лица, опфатени се 1 060 лица од оваа категорија како што се претседателот, пратениците, министрите, судиите, јавните обвинители, членовите на Судскиот совет и на Советот на јавни обвинители.