Совет на Европа: Запрепастувачки висок степен на кршење на човековите права и меѓународното хуманитарно право во Украина

Комесарката на Советот на ЕУ укажа и на „намерното таргетирање од страна на руските сили на цивили и новинари“, како и „сè повеќе пријавени случаи на сексуално насилство од страна на руски војници“

Комесарката за човекови права на Советот на Европа Дуња Мијатовиќ, чија четиридневна посета на Украина, не беше најавена од безбедносни причини, ги повика државите да продолжат да ги поддржуваат напорите на истрагата и обвинителството, јави дописникот на МИА.

„Запрепастувачки се степенот и тежината на кршењето на човековите права и меѓународното хуманитарно право што се случија по агресијата на Руската Федерација против Украина“,

рече комесарката Мијатовиќ, на крајот од четиридневна посета на Киев и неговиот регион.

Таа ги повика државите да продолжат да ги поддржуваат истражните и обвинителските напори „за да ги координираат тесно со украинските власти, граѓанското општество и Меѓународниот кривичен суд“.

„Имињата на Буча, Бородинка, Ирпин или Андриивка ги симболизираат ужасните дела што се извршени овде. За жал, нивните жители не се сами во нивните страдања. Има многу повеќе луѓе низ Украина кои претрпеле нераскажани злосторства. Секој од нив заслужува правда и не смее да биде заборавен,

додаде Мијатовиќ.

Градоначалникот на Буча тврди дека досега се пронајдени тела на 403 лица убиени во овој град

Комесарката посети неколку локалитети надвор од Киев, „што претрпеа артилериски оган, тешки борби и бруталност од страна на руските сили“, информираат од Советот на Европа.

Мијатовиќ укажа и на „намерното таргетирање од страна на руските сили на цивили и новинари“, како и „сè повеќе пријавени случаи на сексуално насилство од страна на руски војници“, „изјави за бројни исчезнати лица“ или дури „нанесена тортура и малтретирање“, особено „на локалните украински функционери“.

„Дури и во време на војна, човечкиот живот и човековите права мора да бидат заштитени… Цивилите и цивилната инфраструктура не смеат да бидат цел. Заробените војници и оние што се предаваат, ранетите и болните, мора да бидат третирани праведно и хумано“,

инсистираше Мијатовиќ.

Зеленски за борбите во Мариупол: Многу војници се повредени, но нема да се предадеме

За време на нејзината посета, комесарката се сретна со неколку украински функционери и политичари, како и бранители на човекови права и членови на невладини организации, се наведува во соопштението.