Зеленски за борбите во Мариупол: Многу војници се повредени, но нема да се предадеме

Кремљ негираше дека руската војска ја нападнала фабриката „Азовстал“

Според најновите проценки на Русија, околу 2 000 украински борци сè уште се скриени во лавиринтот од тунели и бункери под големата челичарница „Азовстал“ во Мариупол, пренесува Хина.

Се верува и дека таму се наоѓаат и неколку стотици цивили.

„Има многу ранети борци, но не се предаваат. Тие стојат на своите позиции“,

изјави украинскиот претседател Володимир Зеленски во синоќешното видеообраќање.

Тој рече и дека нападот ја спречил евакуацијата на преостанатите цивили.

„Замислете го само овој пекол. Таму има и деца. Повеќе од два месеци постојано гранатирање, бомбардирање, смрт“,

рече Зеленски.

Борбите за Мариупол сè уште траат: Зошто овој град е толку важен за Русија?

Русите успеале да влезат внатре со помош на електричар кој го познавал распоредот на фабриката, рекол Антон Герашченко, советник на украинскиот министер за внатрешни работи, пренесува АП.

„Тој им ги покажал подземните тунели кои водат до фабриката. Вчера Русите почнаа да ги напаѓаат овие тунели, користејќи информации добиени од предавник“,

изјави Герашченко во видеоснимка објавена во средата навечер.

Кремљ негираше дека руската војска ја нападнала фабриката.

Освојувањето на Мариупол на Русија ќе ѝ овозможи да воспостави копнен коридор до полуостровот Крим, кој го анектираше во 2014 година.