Самостојниот синдикат за образование, наука и култура (СОНК) очекува изборната комисија при УКИМ да ги стопира и одложи сите свои активности за избор на ректор, врз основа на најновата Уредба на Владата за замрзнување на изборните активности на УКИМ сè до завршување на вонредната состојба во државата.
Во спротивно, како што наведува Синдикатот, ќе имаат основано сомнение дека е направено кривично дело против здравјето и безбедноста на луѓето, како и злоупотреба на службената должност.
„Сигурни сме дека изборната комисија разумно ќе постапи и дека нема да има продолжување на изборниот процес сè до завршување на вонредната состојба. Доколку не се сопрат сите активности во врска со изборниот процес на УКИМ, голем број од нашите членови ќе бидат спречени да го дадат својот глас поради донесената Уредба од страна на Владата, со која во вонредни услови се ослободуваат од работа хронично болните работници, како и родител со деца до 10 годишна возраст. Исто така, во вакви околности е забрането групирање на луѓе, што практично би значело и невозможност да се излезе на гласање за сенатори“,
се вели во реакцијата на СОНК.
Во дописот потпишан од претседателот Јаким Неделков, Синдикатот потенцира дека со оваа реакција нема намера, ниту право да се меша во изборите на УКИМ, но дека има статутарно и морално право да се грижи за здравјето и безбедноста на своите членови.
Владата минатата недела го допрецизирала членот 5 од Уредбата за Законот за високо образование, со што се става во мирување постапката за избор на ректор на УКИМ која деновиве ја бранува академската јавност.
Допрецизирањето на Уредбата доаѓа по реакциите на Независниот академски синдикат (НАКС), на дел од актуелните проректори на УКИМ, како и на потенцијалните кандидати за иден ректор дека постапката што ја иницираше и ја турка сегашниот ректор Никола Јанкуловски е незаконска и нелегитимна во актуелните правни и здравствени околности.