Според професорите кои претендираат на челното место на Скопскиот универзитет, сегашниот ректор подготвуванасилни избори за негов втор мандат, и покрај зголемениот број на заболени од ковид-19, посебно во главниот град
Да прекине постапката за избор на ректор на УКИМ во Скопје, барат тројца кандидати за оваа позиција, поради повторно зголемениот број на заболени од ковид-19 во земјава.
На иницијативата се потпишани професорите Вујица Живковиќ, Петар Атанасовски и Драги Димитриевски, кои претендираат за ректорската позиција на Скопскиот универзитет.
„Со оглед на денешните бројки на инфицирани и активни случаи во Скопје, одржување на избори за ректор во услови на вонредната состојба значат прекршување на здравствените мерките и препораките определени со уредбите на Владата и насоките на ДКСК. Гласањето за ректор и физичкото присуство на околу 2.000 професори и студенти во овие услови значи директно загрозување на здравјето на сите професори и студенти, посебно кога се забранети јавни собири над 20 луѓе. Со гласањето, голема е веројатноста професорите, студентите и членовите на нивните семејства да се заразат, со што УКИМ ќе биде нов кластер на зараза“,
се наведува во барањето.
Според кандидатите за нив ректор, членовите на Комисијата за избори на УКИМ, доколку не ги стопираат изборните дејствија додека трае вонредната состојба и без претседател на Сенат, прават кривично дело согласно со членовите 205 и 206 од Кривичниот законик (кривични дела против здравето на луѓето) и 353 (злоупотреба на службената положба и овластувања).
Тие го критикуваат и сегашниот ректор Никола Јанкуловски дека подготвува, како што оценуваат, насилни избори за негов втор мандат.
„Трагично е што еден лекар кој е сегашен ректор и, како што најави во медумите, кандидат за иден ректор, наместо да се грижи за здравјето на професорите и студентите, презема дејствија на загрозување на здравјето преку насилни избори за негов втор мандат по секоја цена“,
наведуваат противкандидатите на актуелниот ректор.
Тие бараат постапката за избор на ректор да биде прекината во овој момент. Нова постапка, велат, треба да почне кога ќе се создадат побезбедни услови, во една нова законска и статутарна постапка, со нов Сенат и претседател на Сенат. Има време до 15 септември.