Сојузот на стопански комори смета дека фокусот треба да биде на флексибилноста и продуктивноста, а од Владата наведуваат дека ова е една од опциите при што треба да се видат искуствата од поразвиените држави
Сојузот на стопански комори (ССКМ) не се согласува со предлогот на Стопанската комора за намалување на бројот на државните празници. Наместо тоа, од ССКМ порачуваат дека фокусот треба да се стави врз зголемување на продуктивноста и предлагаат отворање дебата за воведување исплата по работен час (саатнина), по примерот на развиените пазарни економии.
Претседателот на ССКМ, Горан Ѓорѓиевски, пред почетокот на тркалезната маса „Посилен глас на бизнисот за реформите“, истакна дека македонските работници се вредни и посветени, поради што решенијата не треба да се бараат во одземањето на неработните денови.
„Нашиот фокус не треба да биде на намалување на празниците, туку на тоа како да се зголеми продуктивноста. Во таа насока, би сакал да отворам прашање за кое сметам дека треба да се дискутира и во иднина, а тоа е плаќањето по работен час, по примерот на развиените пазарни економии. Овој модел ќе ги фаворизира работливите и продуктивните работници, бидејќи ќе им овозможи да заработуваат повеќе, а истовремено ќе донесе и поголема флексибилност на пазарот на труд. Поголемата флексибилност е посебно значајна за родителите и за мајките кои треба да ги усогласат работните и семејните обврски“,
изјави Ѓорѓиевски.
Заменик-министерот за економија и труд Марјан Ристески потврди дека оваа идеа е една од опциите што треба дополнително да се разгледуваат со цел зголемување на продуктивноста и во јавниот и во приватниот сектор.
„Постојат повеќе методологии за пресметување на надоместокот за труд. Треба да ги анализираме искуствата на поразвиените земји каде што работното време и исплатата се организираат врз основа на одработените часови. Ова е прашање што треба да се разгледува во рамки на Економско-социјалниот совет, со сите релевантни институции, синдикати и организации на работодавачи“,
истакна Ристески.
Инаку, Стопанската комора на Македонија на почетокот на месецов најави дека до Министерството за економија и труд ќе достави предлог-измени на Законот за празниците. Со нив се предвидува бројот на неработни денови индиректно да се сведе на 13, а празниците што се паѓаат во недела веќе да не се префрлаат во понеделник.
По оваа најава, од Министерството за економија и труд рекоа дека доколку предлогот биде доставен тогаш тој ќе се разгледува на Економско-социјалниот совет. Министерот Бесар Дурмиши рече дека не треба да се кратат веќе стекнатите права на работниците, а на исто мислење беше и премиерот Хрситијан Мицкоски.
На ова веднаш реагираа и претставниците на синдикатите, кои се спротивставија на дадениот предлог, со кој би се намалиле празниците за работниците.