„Владата ги притиска наставниците и не сака да ги реализира нивните барања, за да има повеќе пари во буџетот за тендери и матни зделки. Додека наставниците работеа за мали плати, Рашковски, Зекири, Дончев, Филипче вртеа милиони на матни тендери. Токму затоа Владата не сака да им ги зголеми платите на наставниците“, стои во писмената реакција на ВМРО-ДПМНЕ
Со заканите за прекин на штрајкот и бркање на наставниците од работа се загрозуваат нивно основно право загарантирано со Устав, реагираат во писмено соопштение од опозициската ВМРО-ДПМНЕ, откако вчера министерката за труд и социјална политика, Јованка Тренчевска истакна дека ако наставниците не се вратат на работа со оглед дека штрајкот е ставен во мирување, ќе се сметаат за неоправдано отсутни и може да изгубат работа.
Правото на штрајк е загарантирано со Устав, додаваат од ВМРО-ДПМНЕ, а Владата се однесува спротивно на тоа, како и со сè што досега правеше.
„Заканите на Тренчевска дека ќе ги брка од работа оние кои ќе штрајкуваат е газење на авторитетот и достоинството на просветните работници. Заканите и уцените од страна на владата се фијаско кое ќе остане црна дамка за власта која ќе се памети засекогаш. Понижувањето на наставниците нема да биде заборавено“,
стои во реакцијата од ВМРО-ДПМНЕ.
Како што додаваат од партијата, просветниот кадар се наоѓа во нерамноправна и лоша позиција, а додаваат оти е потребно прифаќање на нивните барања и овозможување на, како што велат, достоинствени услови за работа.
„Владата ги притиска наставниците и не сака да ги реализира нивните барања, за да има повеќе пари во буџетот за тендери и матни зделки. Додека наставниците работеа за мали плати, Рашковски, Зекири, Дончев, Филипче вртеа милиони на матни тендери. Токму затоа владата не сака да им ги зголеми платите на наставниците“,
стои во писмената ракција на ВМРО-ДПМНЕ.
Вчера, откако СОНК донесе одлука за ставање на штрајкот во мирување, министерката за труд и социјална политика Јованка Тренчевска за ТВ 24 истакна дека наставниците би можеле да ја изгубат работата доколку денеска не се појават на настава, со оглед на тоа што штрајкот е ставен во мирување.
Изјавата на Тренчевска следеше само неколку часа по соопштената одлука на СОНК, откако членови на Синдикатот се собираа пред неговото седиште во знак на револт од донесената одлука, за која велат, воопшто не биле консултирани.
За прекинот на штрајкот и враќањето на учениците во училишните клупи денеска реагираа и од владејачкиот СДСМ, од каде порачаа дека за децата е најважно да бидат во училишните клупи и да следат настава.
„Наставата за учениците започна денеска откако СОНК објави дека штрајкот е во мирување, согласно Законот за мирно решавање работни спорови. Прекинот на штрајкот дава шанса на дијалогот и продолжување на разговорите. Само преку дијалог може да се дојде до решение“,
стои во писменото соопштение од СДСМ.
Во ниту еден момент, додаваат од партијата, не смее да се заборави дека сите чинители во образованието постојат за децата да имаат образовен процес.