Колумбискиот кокаин бил скриен меѓу банани кои фирмата „Банекс компани“ ДООЕЛ ги увезувала од Колумбија и која била краен примател. Уапсени се четири лица – газдата на компанијата, неговиот син, возачот на камионот и вработен во компанијата кој ги истоварал бананите во магацинот во Крушопек
Министерот за внатрешни работи Наќе Чулев денеска на прес-конференција соопшти детали за вчерашната акција во скопското село Крушопек, каде што е запленет еден килограм кокаин. Чулев рече дека оваа заплена е дел од поголема пратка чија крајна дестинација била нашата земја.
Иако во медиумите се појавија информации дека вкупната пратка била од еден тон до еден тон и 300 килограми, Чулев денеска не одговори на прашањето за колкава количина се работи. Рече дека кај нас е запленет еден килограм и дека останатата количина е во друга земја, но не кажа во која, како што рече, во интерес на истрагата.
„Не можам да ви кажам за кое количество се работи, целокупното количество било наменето и со крајна дестинација во нашата држава. Во нашата држава е фатен само еден килограм, целокупната друга количина е во друга држава. Не можам да ви кажам ниту за количеството ниту сум спомнал други држави. Со цел заштита на истрагата, во координација сме со ОЈО за гонење организиран криминал за тоа кои податоци во оваа фаза може јавно да ги изнесеме“,
рече Чулев додавајќи дека сите детали за количината, за патот по кој се движела пратката, ќе ги соопшти во следните неколку дена.
Чулев не сакаше ниту да ги коментира пишувањата на медиумите и тука и во регионот за тоа во која држава е останатиот дел од пратката со кокаин.
Пакетче скриено меѓу 1 098 пакети банани
За самата акција кажа дека е резултат на меѓународна полициска соработка за прекин на меѓународен канал на шверц со дрога од Колумбија.
На заплената ѝ претходела акција која траела од 17 до 19 февруари во која биле вклучени МВР, Царината и Јавното обвинителство за гонење организиран криминал и корупција.
Дрогата што вчера е запленета во Крушопек влегла во земјава во 9 часот на граничниот премин „Ќафасан“, во камион кој носел банани. Камионот го возел црногорски државјанин. Акцијата добила завршница кога камионот со пакетите банани пристигнале во магацинот на фирмата „Банекс компани“ ДООЕЛ во Крушопек, која според Чулев била крајниот примател. На самото место полицијата ги затекнала синот на сопственикот на компанијата и работник кој ја растоварал стоката. За кусо време, како што објасни Чулев, се појавил и сопственикот на фирмата увозник С.Е.
Четирите лица – сопственикот на фирмата, возачот на камионот, синот на сопственикот и работникот се во полициска станица каде што во текот на денот ќе бидат спроведени пред јавен обвинител.
За компанијата „Банекс“, Чулев рече дека досега во 120 наврати направила увоз на овошје претежно банани и главно од Колумбија, но и од Еквадор. Исто така, рече дека денеска ќе се спроведе истрага на сите субјекти со кои оваа фирма имала контакти за да се види дали има поврзаност.
„Доколку во текот на истрагата во координација со Обвинителството се утврди дека и други лица и компании биле инволвирани во оваа нелегална активност, ќе бидат преземени соодветни мерки и активности“,
рече Чулев.
Исто така, ќе биде спроведена и финансиска истрага и на фирми и на физички лица за други кривични дела, како што е перење пари.
Во вчерашната акција одземени се мобилни телефони, пари, 1 098 пакети банани и запленет е камионот.
Изгубени во еуфорија и лажни вести
Во врска со вчерашната заплена на ден килограм кокаин, „360 степени“ објави дека акцијата е дел од поширока меѓународна операција против шверц на кокаин во која се вклучени властите на повеќе држави, меѓу кои и Италија и Црна Гора.
Но, акцијата во повеќе медиуми и на социјалните мрежи се претвори во огромен бран лажни вести и еуфорија кои се пласираа преку наслови како: „Чулев му влезе со клизач на подземјето: Во тек е полициска акција во Сарај, запленети 1,3 тони кокаин“, „Затоа ли Чулев деновиве синхронизирано напаѓан?: Во Крушопек се запленети 1,3 тони колумбиски кокаин“, „МВР под водство на Чулев почна да функционира: Запленетиот кокаин е многу повеќе од нулата на Спасовски“, на кои се „закачи“ и пратеникот од ВМРО-ДПМНЕ Илија Димовски, кој на Фејсбук коментираше: „Во три години власт на СДСМ не слушнавме дека е запленет ниту еден килограм кокаин… Денес МВР заплени 1,3 тони… Најголема количина било кога запленета во РМ… Слепи ли биле? Или…?“.
Исто така некои медиуми ја поврзаа македонската акција, со пишувањето на италијанските медиуми за апсење на 42-годишен Албанец кај Порденоне, кого Грција го барала зашто бил дел од криминална структура што внела 1,2 тон кокаин на територијата на Европа во периодот од септември 2018 до јануари 2020 година.
Иако количината на дрогата се совпаѓа со наводите во дел од медиумите за нашиот случај, полициски извор за „360 степени“ потврди дека апсењето во Италија и акцијата во Крушопек не се поврзани.
Исто така, во очекување на повеќе информации од МВР, изворот на „360 степени“ вели дека македонската полиција не учествувала во акцијата со информации, туку се вклучила на самиот крај со логистика, по дојава и барање на италијанските власти.
Албанската телевизија Топ Чанел денеска објави дека албанските служби ја следеле пратката од Црна Гора преку албанска територија кон Северна Македонија „во услови на целосна безбедност и тајност“.