Италијанските медиуми јавуваат дека вчеравечер италијанската полиција кај Порденоне уапсила 42-годишен Албанец, кого Грција го барала зашто бил дел од криминална структура што внела 1,2 тон кокаин на територијата на Европа во периодот од септември 2018 до јануари 2020 година
Иако количината на дрогата се совпаѓа со наводите во дел од медиумите за случајот што вечерва е актуелен во земјава, апсењето во Италија и акцијата во Крушопек не се поврзани, тврди полициски извор
Министерот Наќе Чулев само ја потврди акцијата во Крушопек, но не излезе со никакви детали, најавувајќи повеќе информации за утре. Упатен извор соопшти дека во Крушопек е запленет еден килограм кокаин, а не 1,3 тон, како што јавија некои медиуми
Апсењето кај Порденоне, Северна Италија, и акцијата во селото Крушопек, Општина Сарај, не се поврзани, вели за „360 степени“ упатен полициски извор. Дел од медиумите во земјава вечерва ги доведоа во врска двата случаи, најверојатно поради тоа што се споменува слична количина кокаин.
Причина за забуната е и одлуката на министерот за внатрешни работи Наќе Чулев вечерва да не споделува детали за акцијата во Крушопек. Тој само потврди дека МВР презема оперативни мерки и активности, најавувајќи повеќе информации утре.
За што е апсењето во Италија?
Повеќе италијански медиуми известуваат дека вчера во рутинска контрола кај Порденоне, во северна Италија, полицијата легитимирала возач и двајца патници на „бе-ем-ве“, за кои се покажало дека се државјани на Албанија. По дополнителните проверки, името на едниот од нив, 42-годишник, се појавило на листата на лица што се бараат со потерница.
Станува збор за барање на Грција, активирано на 3 февруари оваа година, со сомневање дека тоа лице е дел од криминална структура што успеала да прошверцува околу 1,2 тон кокаин од Јужна и Средна Америка на територијата на Европа. Според пишувањата на италијанските медиуми, отпочната е процедура за испорака на уапсениот на Грција.
Што знаеме за акцијата во Крушопек?
Тоа што наведоа дел од медиумите да го поврзат овој случај со вечерашнава акција на македонската полиција во скопското село Крушопек, најверојатно, е количината на дрога што се споменува во двата случаи. Некои медиуми јавија дека МВР запленило 1,3 тон кокаин во Крушопек, што е слично како и во случајот во Италија.
*поврзана вест Чулев потврди дека има акција во Крушопек, но не и дека е запленет еден килограм, а не еден тон кокаин
Сепак, полициски извор демантираше дека станува збор за заплена од вакви размери. Во Крушопек, според истиот извор, е запленет еден килограм кокаин, пратка чие движење било контролирано од италијанската полиција. Дрогата пристигнала заедно со банани, кои биле внесени во земјава со три камиони и истоварени во магацин во Крушопек. Камионите влегле во Македонија од Албанија, а таму од Црна Гора.
Министерот за внатрешни работи Наќе Чулев не соопшти детали за акцијата, но и даде политичка димензија. „Помина времето кога високото раководство во МВР соработуваше и ги поддржуваше криминалните структури во државата“, напиша Чулев на Фејсбук.
Во очекување на повеќе информации утре од МВР, изворот на „360 степени“ вели дека македонската полиција не учествувала во акцијата со информации, туку се вклучила на самиот крај со логистика, по дојава и барање на италијанските власти.