Владата на Словенија на 9 мај покрена постапка за признавање на државата Палестина. Потоа најави дека одлуката ќе ја испрати до Народното собрание најдоцна до 13 јуни
Плановите на Владата на Словенија денеска да ја признае државата Палестина се одложени со предлогот за референдум поднесен од опозициската Словенечка демократска партија (СДС), пренесуваат словенечките медиуми.
Владата на Словенија на 9 мај покрена постапка за признавање на државата Палестина.
Според словенечките медиуми, Јанез Јанша, лидерот на СДС, изјавил дека одлуката на владата да ја признае Палестина веќе ѝ нанела долгорочна штета на Словенија бидејќи, како што посочил, со тоа ја поддржува терористичката организација Хамас.
Проценките се дека предлогот на СДС најверојатно нема да има поддршка со оглед на силната мнозинска коалиција во Собранието.
Според Тања Фајон, министерката за надворешни работи, овој потег на опозициската СДС не е искрен и го смета за обид да се направи заостанување на словенечкото општество.
„Ако некој има искрена намера да се залага за мир, тогаш мора да се залага и за решение со две држави. Кога ќе видиме дека повеќе од 36 000 луѓе се убиени во Газа, кога гледаме крвопролевање и глад, не можам да разберам како словенечкото општество може да прифати тоа“,
вели таа.
Владата на Словенија на седницата на 30 мај донесе одлука да му предложи на Државното собрание признавање на Палестина како суверена и независна држава, по што симболично беше истакнато палестинското знаме.
Според словенечкото право, само Државното собрание (Народното собрание) има овластување да ја признае независноста на државите, а последниот потег значи дека признавањето ќе се одложи за најмалку еден месец бидејќи деловникот предвидува дека претставниците не можат да разгледаат предлог-референдум 30 дена по неговото поднесување.
Премиерот Роберт Голоб изјави дека одлучиле да ја признаат Палестина како независна и суверена држава во границите предвидени со Резолуцијата на Обединетите нации од 1967 година или во границите за кои инволвираните страни би се договориле во идниот мировен договор.
„Оваа одлука има една порака. Порака до двете страни дека сакаме итен прекин на непријателствата и дека сакаме итно ослободување на заложниците. Ова признание не е насочено против никого, дури ни против Израел. Ова е порака за мир. Сметаме дека денес е моментот кога сите ние, целиот свет, мора да дејствуваме само во една насока, во насока која носи траен мир на Блискиот Исток, во насока на решение со две држави“,
рече Голоб.
Владата на Словенија на 9 мај покрена постапка за признавање на државата Палестина. Потоа најави дека одлуката ќе ја испрати до Народното собрание најдоцна до 13 јуни.
Шпанија, Ирска и Норвешка официјално ја признаа палестинската држава на 28 мај. Оваа одлука се смета за начин да се постигне траен мир на Блискиот Исток.