Во однос на вакцините од Кина, министерот рече дека е расчистена административната процедура и без да прецизира конкретни рокови посочи дека сите дози ќе пристигнат наеднаш
Министерот за здравство, Венко Филипче, во гостувањето на Сител ТВ најави дека наредната недела ќе се одлучува дали ќе има заострување на мерките за заштита од ковид-19 откако периодов се бележи зголемување на бројот на заразени.
„Изминатите денови имаме интензивна комуникација со членовите на Комисијата за заразни болести и тоа што сега правиме е – ги пратиме бројките, дали овој тренд на зголемување на бројките ќе продолжи, дали ќе биде слична слика како месец ноември … Засега не е. Заклучно со почеток на следната недела ќе одлучуваме дали се потребни дополнителни рестриктивни мерки или не“,
најави Филипче.
Министерот зборуваше и за набавката на вакцини, па ги повтори најавите кои претходно ги даде и премиерот Зоран Заев, дека в недела со брза пратка би требало да стигнат првите руски вакцини.
Како што рече Филипче најавата е оти руската вакцина „Спутник В“ ќе стигне во недела со специјален транспорт, преку компанијата ДХЛ.
Оваа вакцина, објасни министерот, за разлика од фајзеровата се чува на температура од – 18 до -20 степени за што, уверува, нашата инфраструктура е спремна. Кога ќе пристигне ќе смести во нашите фрижидери и ќе се организира процесот на вакцинацијата во пунктовите во Здравствениот дом во Скопје.
Кога станува збор за кинеските за кои беше повлечен авансот, Филипче рече дека пречките се надминати и дека 200 000 дози од вакцината на „Синофарм“ треба да пристигнат наеднаш, но не сакаше да прецизира конкретни рокови кога.
„Сега се расчисти административната процедура, сега разговараме за кога треба да пристигне таа кинеска вакцина. Тоа што со сигурност го знаеме е дека разговараме, и за тоа зема обврска и кинеската страна, целокупната количина ќе стигне веднаш. Но сега, навистина не знам, очекувам информација“,
рече Филипче.
Министерот за здравство потсети дека овие денови почнале разговори со „Астра Зенека“ за количина од 200.000 дози и додаде оти се разговара за деталите.