Обвинителството за гонење организиран криминал и корупција на денешното рочиште од судскиот процес почна со презентирање на материјалните докази, а освен снимките од претресите, на кои се гледа моментот кога полицијата во кујната во ѕидот зад плочките ги пронаоѓа парите, беа изведени и ливчиња со броеви на судски предмети, податоци од ДКСК, имотни листови, документи за недвижности, возила, акции и банкарски кредити
„Ѓоко, судијата, го користи овој простор“. Ова го кажал таткото на обвинетиот апелициски судија Ѓоко Ристов откако истражните органи ги откриле парите – 350 000 евра, заѕидани во семејната куќа во Неготино.
Обвинителката на Основното јавно обвинителство за гонење организиран криминал и корупција, Искра Хаџи Василева, на денешното рочиште почна со изведување на материјалните докази, а во судницата се пуштаа видеоснимки од претресите, на кои се гледа моментот кога полицијата во кујната во ѕидот зад плочките ги пронаоѓа парите спакувани во 13 пакувања обвиткани со алуминиумска фолија. Полицијата во ѕидот во семејната куќа пронашла вкупно 610 банкноти во апоени од 200 и 500 евра.
Во таа насока, беше наведено и она што таткото на Ристов им го кажал на полицајците кога ги нашле фолиите. Тој рекол дека не знае што има во нив и дека тој простор во куќата го користи неговиот син.
Во куќата имало и ливчиња со броеви на предмети во кои бил инволвиран судијата Ристов, а беа презентирани и податоци од Државната комисија за спречување на корупцијата (ДКСК) за имотната состојба на судијата и неговата сопруга, која е вработена во Државното правобранителство. Меѓу материјалите, беа приложени имотни листови од 2008 и 2021 година, кои се однесуваат на недвижности, возила, акции и кредити, пренесоа медиумите.
Според доказите на Обвинителството, Ристов и неговата сопруга како кокредитобаратели купиле стан во Охрид од фирмата на Љупчо Пецов-Ѓаволот, кој потоа бил пренесен на таткото на сопругата, при што, според обвинението, биле вклучени сложени финансиски и полномошни конструкции меѓу инволвираните лица.
Инаку, истрагата против Ристов почна откако ексдржавниот правобранител Фехми Стафа, како адвокат на Пецов, беше ин флагранти фатен со мито, дадено за да посредува кај апелациски судија за укинување на притворот на неговиот клиент.
На рочишето, пренесе телевизијата Телма, обвинителството презентира и видеа од безбедносни камери кои покажуваат како Стафа го посетува Ристов во неговата канцеларија во Апелацискиот суд.
„Оној дел кој се однесува на Љупчо Пецов, тоа се докази со кои Обвинителството сака да покаже дека (обвинетиот) одлучувал претходно и се познавал со ова лице, во дел од постапките осомничен, во дел од постапките пријавител“,
рече обвинителката Искра Хаџи Василева.
Бранителот на Ристов, адвокатот Ѕвонко Давидовиќ, пак, реагираше дека не биле целосно запазени прописите при пронаоѓање на парите, наведувајќи дека доказите се контаминирани.
„Парите се предадени во трети месец во Агенцијата за одземен имот. Ливчињата, алуминиумските фолии и парите се во иста кеса однесени во МВР, па се манипулирани, во смисла, ракувано е со нив во трети месец. Вадени се парите да се предадат во Агенцијата и во четврти месец е вршено вештачење. На плочките и на подот се ставани пари, ракавиците се скинати“,
рече адвокатот Давидовиќ.
Одбраната на Ристов најави дека како сведоци ќе бидат викнати и Стафа и Пецов, а побара и присуство на вештакот кој ги изготвил наодите за биолошките траги кои според Обвинителството покажуваат дека судијата Ристов ги заѕидал парите.
Обвинетиот судија Ѓоко Ристов на рочиштето на 28 мај рече дека ги разбира делата што му се ставаат на товар – прикривање имот и перење пари – но се изјасни за невин.