Шести ден од привременото примирје во војната Израел-Хамас: Се чека ослободување на нови заложници

Израелските медиуми пренесуваат дека веќе се информирани семејствата на заложниците кои ќе бидат ослободени денеска, на вториот ден од продолженото примирје

Списокот со имиња на киднапирани Израелци кои Хамас треба да ги ослободи во текот на денот бил доставен до израелскиот премиер Бенјамин Нетанјаху, соопштуваат од неговиот кабинет. Тоа ќе биде шеста група заложници кои се ослободени како дел од привременото примирје.

Од петокот, кога почна привременото примирје, Хамас секој ден ослободуваше по десет жени и деца киднапирани во нападите врз јужен Израел на 7 октомври, а Израел, пак, ослободуваше трипати повеќе палестински затвореници, жени и малолетни мажи.

Дванаесет заложници, од кои десет Израелци, еден Тајланѓанец и една Филипинка, како и 30 палестински затвореници, се ослободени синоќа.

Израелските медиуми пренесуваат дека веќе се информирани семејствата на заложниците кои ќе бидат ослободени денеска, на вториот ден од продолженото примирје.

Договорот за прекин на огнот, постигнат со посредство на Катар, со поддршка на САД и Египет, досега дозволи ослободување на 60 израелски заложници и 180 палестински затвореници.

Договор е постигнат: Прво примирје меѓу Хамас и Израел, се чека на ослободување на заложниците

Надвор од договорот, 21 странски заложник, главно Тајланѓани кои живеат во Израел, беа ослободени.

Израелските власти проценуваат дека околу 240 луѓе се киднапирани и однесени во Газа на 7 октомври.

Првото четиридневно примирје стапи во сила во петокот, а потоа беше продолжено за уште два дена и тоа трае до утре во 7 часот по локално време. Хамас рече дека продолжувањето е „под истите услови“, кои предвидуваа ослободување на 50 израелски заложници во замена за 150 палестински затвореници.

Примирјето меѓу Израел и Хамас се продолжува за два дена

Во меѓувреме, посредниците се обидуваат да го продолжат примирјето и размената на заложниците и затворениците да продолжи и по четврток.

Засега, примирјето може да се продолжи за еден ден. Израел вели дека на секои 10 ослободени заложници над почетните 50, паузата ќе биде продолжена за еден ден.

Сепак, неизвесно е дали може да трае повеќе од 10 дена, како што беше предвидено во првичниот договор.

Продолжувањето на прекинот на огнот овозможи испорака на нова помош за жителите на Појасот Газа, кој Израел го бомбардира веќе седум недели.

Генералниот секретар на ОН, Антонио Гутереш, го нарече примирјето „тронка надеж и хуманост среде темнината на војната“.

Претседателката на Европската комисија Урсула фон дер Лајен на платформата Икс напиша дека го поздравува постигнатиот договор за продолжување на два дена пауза во непријателствата меѓу Израел и Хамас. Таа уште еднаш ги повика терористите на Хамас да ги ослободат сите заложници земени за време на нивниот ужасен напад на 7 октомври.

Фон дер Лајен: Договорот меѓу Израел и Хамас го продолжува прозорецот на надеж за цивилите во Газа да имаат пристап до помош