Шефот на МАAЕ побара од ОН пристап до нуклеарната централа во Запорожје: Состојбата е сериозна, времето истекува

Областа околу електраната Запорожје, најголемата во Европа, од почетокот на март е под руска контрола

Генералниот директор на Меѓународната агенција за атомска енергија (МААЕ), Рафаел Гроси побара во Советот за безбедност на ОН пристап до нуклеарната централа во Запорожје, Украина, каде се вршат воздушни напади, за што Москва и Киев меѓусебно се обвинуваат.

„Ситуацијата е сериозна и МААЕ мора да биде овластена да ја изврши својата мисија во Запорожје што е можно поскоро“,

нагласи Гроси, говорејќи онлајн за време на итниот состанок на Советот за безбедност на ОН посветен на украинската нуклеарна централа.

Воените активности околу централата Запорожје ги прекршуваат сите нуклеарни стандарди за безбедност

Гроси рече дека „времето истекува“ и потсети дека МААЕ со недели се обидува да испрати мисија за проверка на објектот.

Областа околу електраната Запорожје, најголемата во Европа, од почетокот на март е под руска контрола.

САД повикаа на создавање демилитаризирана зона околу нуклеарката Запорожје во Украина

Со цел да се гарантира безбедноста на локацијата и да се овозможи инспекциската мисија, генералниот секретар на ОН Антонио Гутереш и САД повикаа на формирање демилитаризирана зона околу централата.