Советот за безбедност на Обединетите нации денеска ќе одржи состанок посветен на Северна Кореја, откако Пјонгјанг во петокот тестираше интерконтинентална балистичка ракета
Севернокорејската министерка за надворешни работи Чое Сон Хуи го нарече генералниот секретар на Обединетите нации Антонио Гутереш „марионета на САД“.
Гутереш силно го осуди последното лансирање на интерконтинентална балистичка ракета од Северна Кореја во петокот и го повтори својот повик до Пјонгјанг „веднаш да се откаже од преземање какви било дополнителни провокативни дејства“, објави АП.
Неговото осудување дојде откако САД и други земји упатија слични критики за лансирањето на ракетата, што покажа потенцијал за напад каде било во континенталнниот дел на САД.
„Често го сметам генералниот секретар на ОН како член на Белата куќа на САД или нејзиниот Стејт департмент“,
рече севернокорејската министерка во изјавата што ја пренесоа државните медиуми.
Таа изрази силно жалење поради, како што рече, фактот што генералниот секретар на ОН зазеде многу жална позиција, несвесен за целта и принципите на Повелбата на Обединетите нации и нејзината соодветна мисија, а тоа е одржување на непристрасност, објективност и правичност во сите работи.
Советот за безбедност на Обединетите нации денеска ќе одржи состанок посветен на Северна Кореја, откако Пјонгјанг во петокот тестираше интерконтинентална балистичка ракета.
Државната новинска агенција КЦНА објави дека севернокорејскиот лидер Ким Јонг Ун го надгледувал тестирањето на новата интерконтинентална балистичка ракета, при што повикал на поинтензивен развој на стратешко оружје и обука на тактички нуклеарни единици.