Ако се изземат сите кривични дела за ширење на заразата, стапката на класичниот криминал е во опаѓање, пред сè, за кривичните дела разбојнички кражби, тешки кражби и измама, соопшти министерот за внатрешни работи, Наќе Чулев, во вечерашното гостување во емисијата „Топ тема“ на Телма ТВ.
Тоа е нормално, рече Чулев, затоа што има лимитирано движење на населението.
Тој посочи и конкретни статистики, па така за кривичното дело тешка кражба рече дека има опаѓање за 45 отсто, а за измама од 60-65 проценти.
Исто така, забележано е и намалување дури до 50 отсто на сообраќајките со тешки последици.
Од друга страна, пак, статистиката за првото тромесечје покажува дека има зголемување на случаите на семејно насилство. Чулев, не спомена конкретни бројки туку најави дека чекаат да заврши април за да направат статистика само за периодот откако е воведен полицискиот час за да се види колку зголемувањето на семејното насилство е поврзано со ограничувањето на движењето.
Сепак, тој ги повика жртвите на семејно насилство слободно да отидат во полициска станица и да пријават без разлика дали е полициски час или не.
Нема да бидат казнети за прекршување на забраната за движење, рече Чулев, туку ќе им биде излезено во пресрет.