Лидерот на Алијанса за Албанците, Зијадин Села, попладнево на прес-конференција рече дека не се согласува во целост со одлуките на Владата за заштита од ковид-19, а меѓу мерките со кои не се согласува е должината на полицискиот час и карантинот за Тетово.
„Не се согласувам со тоа што имавме одлуки за полицискиот час да трае над 48 часа, бидејќи тоа придонесе да се формираат редици пред маркетите, а во тие редици и собирање на граѓаните, што е спротивно на препораките на СЗО, сигурно дошло до тоа некој да се инфицира од ковид-19“,
рече Села.
Тој посочи дека полициски час е потребен, но тој да почнува во 19 часот и да трае до 5 часот наутро за граѓаните да може да набават што им е потребно. За маркетите, тој посочи оти, како што предложиле пред две недели, требало да се направи план за шалтерско пазарење односно купувачите да одат со список до маркетот и истиот да им го даваат на вработените. Вработените во маркетите да ги соберат продуктите и да им ги дадат на купувачите кои чекаат надвор.
Понатаму, Села потенцираше и оти не смета дека е потребен карантин за Тетово.
„Не се согласувам со одлуката за карантин во Куманово, Прилеп и Тетово. Делумно се согласувам, но не знам од која причина и Тетово треба да е во карантин. Ако Владата знае некои бројки кои ние не ги знаеме, треба да ги каже. Не може со само 20 заразени на ниво на Општина Тетово, овој град да влезе во карантин. Друго, граѓаните се принудени да носат маски. Во ред, тоа е еден од механизмите за заштита, но државата треба да им обезбеди маски на граѓаните, на сите граѓани на целата територија“,
рече лидерот на Алијанса за Албанците.