Коментирајќи ја активната блокада на Собранието од опозициската ВМРО-ДПМНЕ, лидерот на Алијанса за Албанците, Зијадин Села, на денешната прес-конференција рече дека сите начини на дејствување кои се демократски и политички се легитимни и додаде оти е легитимно опозицијата да направи нешто во Собранието против корупцијата, да направи нешто за да спречи игри врз грбот на граѓаните за што профит би имале политичките партии на кои, посочи Села, тоа не им е дозволено
Секој политички субјект има легитимно право да избере како ќе дејствува во и надвор од Собранието, рече денеска лидерот на Алијанса за Албанците (АА), Зијадин Села во врска со одлуката на опозициската ВМРО-ДПМНЕ активно да ја блокира работата на парламентот, што започна од вчера.
Според Села, сите начини на дејствување кои се демократски и политички се и легитимни, но оти не може да бидат легитимни, како што рече, уценувања на сигурноста и на животот на некој друг зашто е против.
„Но, легитимно е опозицијата да направи нешто во Собранието против корупцијата, да направи нешто за да спречи игри врз грбот на граѓаните и да имаат профит и бизниси политичките партии на кои тоа не им е дозволено. Ние имаме своја агенда, ја кажавме, но почитуваме агенди и на други политички партии. Почитуваме автономни дејствувања на секој политички субјект и истото го очекуваме од другите“,
рече Села одговарајќи на новинарски прашања по прес-конференцијата во Собранието.
Во овој контекст, тој се осврна на законот за игри на среќа, обвинувајќи дека целта на ДУИ со предложеното решение е да направи, како што рече, уште едно трговско друштво во рамки на Државната лотарија, за партиска потреба.
„Во прашање се милиони евра кои ќе легнат на сметката на функционери на ДУИ или директно кај ДУИ. Нема друг начин во овој случај, освен да се блокира. Затоа велам дека е легитимно да се направат вакви политички чекори“,
истакна Села.
На прес-конференцијата во Собранието, лидерот на АА соопшти и дека за само шест дена околу 80 000 граѓани аплицирале за виза во германската амбасада, но, како што рече, оваа информација не е се уште официјално потврдена, а е резултат на оние кои веќе 20 години се на власт.
Инаку, активната блокада на Собранието од страна на ВМРО-ДПМНЕ започна вчера, кога пратениците од опозициската партија дојдоа со транспаренти и ја бојкотираа вчерашната собраниска седница.
Вчерашната собраниска седница започна со доцнење од речиси два часа, а координаторот на пратеничката група на ВМРО-ДПМНЕ и коалицијата „За обнова на Македонија“, Никола Мицевски, во процедурално обраќање ѝ забележа на власта за доцнењето, порачувајќи им на пратениците од мнозинството оти ним не им треба активна блокада зошто, како што рече, самите се блокираат и побара од спикерот Талат Џафери да ги укори оние што не се присутни во салата.
Пред почетокот на вчерашната активна блокада на Собранието од страна на опозицијата, владејачкиот СДСМ посочи дека пратениците на ВМРО-ДПМНЕ кои ќе го бојкотираат и блокираат Собранието не смеат да бидат платени од граѓаните, за како што велат, својата неработа и деструктивно однесување.
Денеска, пак, СДСМ објави фотографии од пратениците на ВМРО-ДПМНЕ и партискиот лидер Христијан Мицкоски наредени како на матурско табло нарекувајќи ги „неработниците и класниот“, кои како што посочија во објавата, „нè чинат 55 000 евра месечно“.